Presidenti turk Erdogan ka paralajmëruar Athinën që të çmilitarizoj ishujt që ai pretendon se i janë dorëzuar Greqisë në mënyrë paqësore.
Ankaraja ka akuzuar gjithashtu autoritetet greke për ndërtimin e një baze ushtarake në kundërshtim me Traktatin e Lozanës të vitit 1923 dhe Traktatin e Parisit të vitit 1947, të cilat garantojnë statusin e paarmatosur të ishujve.
Erdogan deklaroi se ai “nuk bën shaka” dhe madje publikoi një seri postimesh në Twitter në greqisht dhe anglisht .
“Turqia nuk cenon të drejtat dhe ligjin e askujt, por as nuk lejon shkeljen e të drejtave të saj dhe ligjit nga askush” shkroi presidenti turk.
Pasi Erdogan vendosi të postonte në greqisht, një zëdhënës i qeverisë në Athinë u kundërpërgjigj duke nënvizuar se greqishtja njihet si gjuha e arsyes, lirisë dhe drejtësisë, por taktikat që ka zgjedhur Turqia nuk i përkasin asnjërës prej këtyre kategorive.
Madje, ish-kryeministri grek Alexis Tsipras i është përgjigjur Erdoganit në turqisht duke shkruar edhe ai në Twitter se Greqia do të mbrojë sovranitetin e saj kundër të gjitha llojeve të kërcënimeve.
Greqia ka deklaruar se ishujt nuk mund të lihen të pambrojtura.
Ndërsa të dy vendet janë aleatë të NATO-s, ata janë përfshirë prej kohësh në mosmarrëveshje mbi migrimin, kufijtë detarë dhe kërkimin e mineraleve në Mesdheun lindor. Greqia dhe Turqia akuzojnë ushtrinë e njëra-tjetrës për shkelje të hapësirës ajrore.
