Humbja me Izraelin në shtëpi u përjetua si një disfatë totale në lidhje me objektivin, sepse në fakt shanset në Grupin 2 të Ligës B në Nations League janë kompromentuar. E megjithatë, me llogari të bëra, gjithcka është e mundur, në kohën kur është bërë vetëm gjysma e rrugëtimit. Izraeli, me fitoren 1-2 në Arenën Kombëtare mori kështu kryesimin e grupit me 4 pikë, dy mbi Islandën dhe duke lënë vendin e fundit për të besuarit e Rejas me 1 pikë.
Është e kuptueshme se gjërat janë vështirësuar, pasi kemi shpenzuar ndeshjen në shtëpi kundër liderve, që kthimin do ta luajnë në Tel Aviv, por në anën tjetër lojërat janë krejt të hapura. Izraeli do të luajë pas dy ditësh në Rejkjavik kundër Islandës dhe në këtë pikë distance vetëm mund të rritet në raport me kuqezinjtë sido të përfundojë ndeshja, ku natyrisht barazimi do të ishte rezultati më i favorshëm.
Me kundërshtarët që do të kenë luajtur një ndeshje më shumë, skuadrës së Rejas mjafton të fitojë dy ndeshjet e saj për tu renditur në vendin e parë. Kjo nëse islandezët e izraelitët ndajnë pikët ose ishullorët fitojnë, ndërsa një sukses i skuadrës së Alon Hazan do t’i detyronte kuqezinjtë të shkonin në transfertën me Izraelin me alternativën e vetme fitoren me dy gola diferencë. Në këtë pikë, kur gjithcka është ende e mundshme, pikëpyetjen më të madhe shanseve për të arritur objektivin e vendos forma e treguar nga kombëtarja në dy ndeshjet e para, ku gabimeve flagrante i shtohen edhe performancat e dobëta.
