Kreu demokrat Sali Berisha u shpreh gjatë një takimi me strukturat e kësaj partie në Elbasan se në këto muaj ne ngritëm në këmbë Partinë Demokratike, e cila po shndërrohej në një shtojcë të Partisë Socialiste.
Berisha tha se Rithemelimi i PD kërkon hapjen e PD ndaj intelektualëve, ndaj njerëzve patriotë dhe të përkushtuar.
“Duhet të mbrojmë interesin publik dhe në këtë kuadër ne bashkohemi me të gjithë profesionet, nga mjekët te inxhinierët.
Interesi publik sot është më i rrezikuar se kurrë. Nuk di ndonjë moment tjetër që nga 1991 kur interesi kombëtar, qytetar, i biznesmenëve, të jetë rrokullisur sikundër po ndodh tani”, tha Berisha.
Duke u ndalur te takimi i Ohrit, i mbajtur dje në kuadër të Open Balkan, Berisha tha se mesazhet që u thanë ishin një katastrofë. Sipas Berishës, u arrit deri atje sa gjenocidi u konsiderua si diçka normale, dhe Edi Rama si vasal i Vuçiç tha që ti lemë mënjanë çfarë ka ndodhur, a thua se ata që u vranë dhe u masakruan nuk ishin njerëz, dhe të shohim nga e ardhmja.
“Edi Rama është fatkeqësi e njerëzimit me qëndrime të tilla, jo më një fatkeqësi kombëtare”, tha Berisha.
Ai u shpreh se nga “Open Balkan” po rrënohen fermerët shqiptarë, ndërsa Rama na thotë përfiton biznesi. “Po cili biznes po fiton? Nuk flet një fjalë për oligarkët se ndan pasurinë me ta, dhe i është sulur biznesit të vogël. Po taton 23 % profesionet e lira, që do të thotë se ata do të largohen nga Shqipëria, atëherë kush do na sigurojë shërbimet”, tha Berisha.
Gjithashtu kreu demokrat vuri theksin në largimin e mjekëve dhe infermierëve nga Shqipëria, ndërsa tha se po shkatërrohet sistemi shëndetësor, pasi mungon cilësia.
