Pas shpërthimit me tritol në bizneset e tij, Noizy ka dhënë dëshminë para grupit hetimor duke thënë se ishte në gjumë kur ndodhi ngjarja dhe nuk mund të akuzojë askënd pa fakte.
Sipas tij, nuk ka pasur konflikte me njeri duke përjashtuar rastin e fundit me Cllevion, prej të cilit është në procedim penal në gjendje të lirë.
Po kështu mësohet e është pyetur edhe reperi i dëmtuar, i cili ka qëndruar në pozita mohuese. Grupi i Cllevios nuk e ka marrë përsipër shpërthimin dhe nga hetimi i deritanishëm nuk ka ende asnjë të ndaluar.
Grupi hetimor po heton kryesisht në konfliktin e fundit që pati me Noizy, i cili së bashku me grupin e tij dhunuan reperin Cllevio pranë një tjetër lokali në pronësi të tij në Durrës.
Për këtë ngjarje është angazhuar komisariati i Policisë së Durrësit, e më konkretisht Sektori i Krimeve të Rënda.
Mësohet se gjatë ditës së djeshme është vijuar me ekspertizën e vendit të ngjarjes, nga ku është konkluduar se ndaj lokalit të këngëtarit është përdorur lëndë plasëse tritol e shpërthyer me kapsollë me fitil zjarrpërcjellës, pra me ndezje. Më pas lënda plasëse është hedhur mbi qepenin e lokalit butik ‘Illyrian’ duke shkatërruar qepenin e thyer xhamat e lokalit ‘Rigels Shisha Lounge’ si dhe xhamat e disa apartamenteve.
Më pas janë marrë filmimet e disa kamerave aty pranë por deri tani nuk ka pasur asnjë provë konkrete për shpërthimin me lëndë plasëse.
Para disa ditësh, Noizy dhe babai i tij u vunë në qendër të vëmendjes mediatike, pas një konflikti që patën ndaj Cllevio Serbiano, një personazh i njohur kryesisht për videot në rrjetin social “Tik-Tok”, që gjithashtu merret me muzikë.
