Ka kaluar për gjykim çështja në ngarkim të 3 shtetasve të huaj mes të cilëve 2 kamerunas dhe një francezeje, me akuzën e falsifikimit të parave dhe mashtrimit me pasoja të rënda. Jennifer Chollet dhe Zinedin Nkeh kanë kundërshtuar akuzat për futjen në territorin shqiptar të qindra mijëra eurove të falsifikuara dhe letrave “Lastra”. 39-vjeçarja ka mohuar të ketë njohje me dy të tjerët, duke pretenduar se ka rënë viktimë e tyre.
Chollet pretendon se ka një zyrë ndërlidhëse mes investitorëve të huaj dhe Shqipërisë ku sugjeron nevojat blerëse të tyre në vendin tonë kundrejt një komisioni të caktuar. Ajo pranon komunikimet me Ngankam dhe Nkeh, për të cilat thotë se kamerunasit kanë qenë të interesuar për prona në Shqipëri dhe se është pjesë e punës saj.
Por dëshmia e Chollet nuk ka qenë bindëse për prokurorinë e cila pretendon se ka prova bindëse, përfshirë bisedat telefonike apo materialet e sekuestruara. Gjatë kontrollit në banesën e Chollet, u gjetën dhe sekuestruan, letra lastra që shërbejnë për prodhimin e kartëmonedhave, si dhe produkte të tjera që shërbejnë për përgatitjen e tyre.
