Policia italiane ka arrestuar një 44-vjeçar si autor të dyshuar të vrasjes së shqiptares Nevila Pjetri në orët e para të mëngjesit të së dielës në Itali.
44-vjeçari dyshohet se është autor edhe i një vrasje tjetër të ndodhur pothuajse në të njëjtën zonë. Bëhet fjalë për një viktimë të dytë, një transeksual italian, trupi i të cilit ishte gjetur pranë vendit ku u gjet edhe trupi i pajetë i 35-vjeçares Nevila Pjetri, raporton Ansa.
Hetuesit italianë dyshojnë se vrasjet janë të lidhur me një rrjet prostitucioni.
Një makinë “Ford Fiesta” ngjyrë gri u gjet disa qindra metra larg vendit ku ishte hedhur trupi i pajetë i transeksualit. Brenda mjetit u konstatuan dy gëzhoja pistolete dhe gjurmë gjaku në tapicerinë e makinës. Pronar i këtij automjeti është pikërisht 44-vjeçari i arrestuar.
Nevila Pjetri ishte dhunuar dhe vrarë. Trupi i pajetë i saj ishte hedhur në shtratin e një lumi. Kanë qenë disa kalimtarë ata që vunë re trupin e pajetë të shqiptares dhe sinjalizuan policinë.
