Kryeministri Edi Rama ka kritikuar institucionet europiane për burokraci dhe vonesa në mbështetjen e projekteve infrastukturore.
Kritikat e Edi Ramës ndaj Bashkimit Europian u bënë gjatë samitit rajonal të transporteve dhe në prag të samitit të Open Ballkan.
Kryeministri Edi Rama vijon të përdorë takimet rajonale për të lëshuar kritika ndaj Bashkimit Europian. Gjatë samitit rajonal të transportit që u zhvillua këtë të martë në Tiranë, Kryeministri akuzoi institucionet Europiane për burokraci dhe vonesa në mbështetjen e projekteve infrastrukturore.
“Eshtë absolutisht e rëndësishme sot më shumë se asnjëherë tjetër që ecuria e Ballkanit Perëndimor dhe ritmi i kësaj ecurie dhe shpejtësia e kësaj ecurie të jetë pjesë e vëmendjes dhe të jetë pjesë e mbështetjes së strukturave të Bashkimit Europian sepse të presësh nuk e di se sa vite për të bërë një segment hekurudhor nga Tirana në Durrës, që është një segment hekurudhor i një lagjeje të një metropoli të madh, për shkak të burokracisë në institucione europiane, kjo është diçka që realisht dhemb shumë dhe realisht krijon shumë frustrim dhe shkon komplet në të kundërt të qëllimeve të mëdha të përbashkëta dhe natyrisht edhe qëllimit të madh në vetvete të Bashkimit Europian për të inkurajuar sa më shumë që njerëzit tanë të qëndrojnë këtu”, tha Rama.
Kritikat e kryeministrit Rama ndaj Bashkimit Europian vijnë në prag të samitit të Open Ballkan i cili i zhvillon punimet në Ohër të Maqedonisë.
