Pesë dekada përplasje politike dhe diplomatike, sanksione e sulme ndaj ambasadave dhe protestave popullore. SHBA dhe Irani nuk i kanë normalizuar ende marrëdhëniet duke vijuar një betejë që parashikohet të zgjasë edhe gjatë dekadave të ardhshme, por në këtë rast, sporti bën një përjashtim. Amerikanët dhe iranianët do t’i japin duart njëri-tjetrit në një sfidë për Kupën e Botës 2022, ashtu siç ndodhi edhe në vitin 1998.
Dy kombëtaret që janë shortuar në Grupin B, kanë në këmbët e tyre shansin e artë për të shkundur politikën dhe diplomacinë. Presidenti Joe Biden ka dhënë sinjale se një dritare do të vazhdojë të qëndrojë e hapur ndaj vendit islamik dhe ndeshja e Katarit mund të jetë më shumë se një 90 minutësh i thjeshtë futbolli.
Sfida mund të shërbejë përtej 3 pikëshit të rëndësishëm për llogaritë e grupit sepse në lojë janë llogaritë e dy fuqive.
Trajneri amerikan Gregg Berhalter nuk preferon gjuhën diplomatike dhe zgjedh të mbështetet te avantazhet që ofron sporti duke thënë se në fund të ditës, futbolli duhet të japë një mesazh të qartë miqësie. Në krahun tjetër, kolegu i tij, Dragan Skocic u tregua i qartë teksa tha se kjo do të jetë thjesht një ndeshje futbolli dhe asgjë me shumë. “Shpresoj që futbolli t’i ndihmojë njerëzit të kontaktojnë dhe të flasin me njëri-tjetrin”, thekson trajneri kroat.
SHBA dhe Irani janë ndeshur për herë të parë në Kupën e Botës në vitin 1998 kur kombëtarja nga Lindja e Mesme fitoi 2-1. Në atë kohë, trajneri aktual i amerikanëve ishte një komentator i thjeshtë në një televizion holandez. “Ishte hera e parë dhe u zhvillua në kulmin e përplasjeve diplomatike mes dy vendeve. Gjithsesi, në fushën e lojës lojtarët treguan se mund të ishin shumë miqësorë me njëri tjetrin”, thekson Gregg Berhalter.
A do ta shfrytëzojnë diplomatët e dy vendeve mundësinë e artë që kanë për të bërë paqe, qoftë edhe duke hedhur një hap të parë? Këtë do ta mësojmë vetëm pas sfidës së Dohas në 29 nëntor.