Ish-deputeti Genc Pollo e konsideroi si pozicion shumë konstruktiv dhe të moderuar atë që mbajti opozita, e cila ishte e pranishme në seancën e Parlamentit, por nuk mori pjesë në votim.
Pollo tha në emisionin Të Paekspozuarit se zotëria që u zgjodh President nuk e meritonte që të zgjidhej, qoftë edhe për mosveprimet e tij, edhe për këtë situatën që po kalon vendi.
“Janë copëtuar bazat detare, për tia dhënë biznesmenëve të afërt të Qeverisë. Po kështu anijet detare janë sot jo funksionale. Një pjesë e zullumeve i përkasin para se Begaj të merrte detyrën e Shefit të Shtabit, por në dy vjet që ishte në krye të FA-ve nuk ka bërë asgjë, dhe kjo e bën të papranueshëm si President Republike”, tha Pollo.
Ish-deputeti tha se mjafton të shikohet gjendja në bazat e ushtrisë, por edhe rastet ku ndodhen sot Forcat e Armatosura. “Zotëria që u bë President, ishte për dy vite në krye të FA-ve dhe nuk ka bërë asgjë me mosveprimet e tij. Kaq mjafton që ai të mos zgjidhej President”, tha Pollo. Sipas tij, anijet ushtarake mund të dalin në det vetëm kur është i qetë. “Shtabi i Përgjithshëm i FA nuk ka bërë detyrën e tij, të thuash se ky zotëria ka bërë bamirësi, nuk e mbulon mosveprimin e tij”, tha Pollo.
Ai tha se SPAK po heton çështjet, por nuk e di nëse Begaj është marrë si person i dyshuar apo përgjegjës lidhur me këtë çështje.
