Kristiano Ronaldo konfirmon se ai është shumë i lumtur në “Old Trafford” dhe beson se Mançester Junajtid do të rikthehet në nivele të larta sezonin e ardhshëm nën drejtimin e trajnerit të ri Erik ten Hag.
Sulmuesi portugez u rikthye në Premier Ligë pas 12 vitesh verën e shkuar dhe sezonin e mbylli me 24 gola në 38 ndeshje, duke qenë shënuesi më i mirë i klubit ndonëse “Djajtë” bënë një tjetër vit zhgënjyes, duke e mbyllur kampionatin në vend të 6-të. Junajtid mbylli sezonin e pestë pa fituar asnjë trofe, por 37-vjeçari ka vendosur të respektojë kontratën e tij edhe pse në 2022-’23 nuk do të luajë në Champions për herë të parë pas 19 vitesh. Duke folur gjatë një interviste për sajtin e klubit, portugezi tha: “Sigurisht që isha i lumtur që u riktheva në klubin që më ngriti karrierën. Ishte e pabesueshme ndjesia e rikthimit. Ishte shumë bukur të ndieje tifozët, lumturia e tyre ishte fantastike”.
Ten Hag do të marrë rolin e trajnerit këtë sezon dhe Ronaldo i jep mbështetjen e tij holandezit, por edhe paralajmëron se atij i duhet dhënë kohë për të ndryshuar situatën në klub: “E di që ai ka bërë një punë të shkëlqyer me Ajaksin dhe është një trajner me eksperiencë, por ne duhet t’i japim kohë. Gjërat duhet të ndryshojnë në mënyrën siç ai dëshiron. Shpresoj që të ketë sukses sigurisht, sepse nëse ai do të jetë i suksesshëm edhe Mançesteri do të jetë i tillë. Kështu që i uroj suksese. Ne jemi të lumtur dhe të emocionuar, jo vetëm lojtarët, por edhe tifozët gjithashtu. Unë i uroj më të mirën dhe le të besojmë se vitin tjetër ne do të fitojmë trofe”.
Mançester Junajtid nuk po fiton, por e ardhmja e akademisë së tyre premton të jetë e ndritur. Skuadra U-18 fitoi “FA Youth Cup” muajin e shkuar për herë të parë pas 11 vitesh. Ronaldo beson se Ten Hag do t’u japë shansin talenteve të moshave për të treguar veten edhe me ekipin e parë: “Unë jam për t’i dhënë shansin brezit të ri, sepse ata do të jenë e ardhmja. Por ti duhet t’i ndihmosh gjithashtu ata që t’i vendosësh në pozicionin e duhur, sepse ka shumë presion të luash në Premier Ligë, për të cilën unë mendoj se është kampionati më i vështirë në botë me një diferencë të madhe.
Ti duhet t’u japësh atyre kohën, shansin dhe t’i lejosh të përmirësohen në mënyrë normale, pa presion. Por mendoj se duhet t’i japim mundësinë brezit të ri. Ata e kuptojnë se për të fituar ti duhet të bësh sakrifica, të punosh fort, të kesh etikë pune, të jesh i dedikuar. Por sigurisht që nëse fëmijët do të kërkojnë këshillat e mia, unë do të jap opinionin dhe këshillat e mia sepse dua të ndihmoj.”, u shpreh Ronaldo.
