Kryetari i Partisë Demokratike, Sali Berisha kërkoi gjatë mbledhjes së Këshillit Kombëtar, të nisin mbledhjet e kryesive të degëve lokale dhe grupseksionet, për të diskutuar situatën në të cilën ndodhet vendi.
Berisha foli edhe për zgjedhjen e presidentit të ri të vendit. Përpara anëtarëve të Këshillit Kombëtar të PD, Berisha tha se Rama do të zgjedhë nesër kukullën e tij, duke shtuar se kryeministri ka shtënë në dorë 100% të pushtetit.
“U bëj thirrje kryetarëve të degëve të PD të mbledhin me urgjencë kryesitë, grupseksionet dhe të zhvillojnë një debat të hapur politik me to.
Ne kemi sot një anëtarësi me ideale të larta, me pjekuri të madhe politike, me përgjegjësi të madhe politike, të gatshme për t’iu përgjigjur çdo sfide.
Nesër Edi Rama firmos me votat e vjedhura pushtetin e tij 100% në Shqipëri. Zgjedh kukullën e tij. Pra, zhvillimet janë dramatike. Por qëndrimi ynë duhet të jetë gjithashtu më i vendosuri, më i fuqishmi që kemi treguar ndonjëherë ndaj një regjimi armiqësor, autokratik, të inkriminuar nga i pari tek i fundit në këtë vend, siç është regjimi i Edi Ramës.
Unë kam besim të madh tek anëtarët dhe simpatizantët tanë se s’do pranojnë kurrë këtë plaçkitje të paskrupullt, të pangopshme të qytetarëve shqiptarë, s’do pranojnë kurrë këtë shkelmim para botës së qytetëruar të interesave jetike kombëtare të shqiptarëve. Ata që mohojnë gjenocidet janë kriminelë, ata shkelin ligje kombëtare dhe ndëkrombëtare, ndaj dhe ne duhet të ngrihemi sa më shpejt, dhemb për dhëmb deri në triumfin e interesit tonë kombëtare, të vlerave demokratike.
Në këto rrethana do t’i përgjigjemi me vendosmërinë më të madhe kushtrimit që buron sot nga shpirti, zemra e çdo shqiptari atdhetar që e do këtë vend”, u shpreh Berisha.
Ish-Kryeministri i bëri thirrje Këshillit Kombëtar të dalë në debat për të gjitha problemet që po rrënojnë shqiptarët, ku më kryesori është qëllimi kombëtar i cili po rrënohet për ditë nga qeveria e Edi Ramës, duke e kthyer edhe në Tiranën në një Beograd të vogël.
“Ti dalim zot vendit ti dalim zot kryeqytetit dhe të mos pranojmë kurrë që Tirana të shndërrohet në Begradin e vogël për shqiptarët. Ata kërkojnë nga ne që të mos pranojmë kurrë që Edi Rama ky vasal i Vuçiçit, ky Duman i pushtetit, të shkelmojë mbi gjakun sakrificën e mbi 10 mijë fëmijëve grave dhe burrave të rinjve shqiptarë në Kosovë dhe nuk po flasim as për vitet ‘874, as për vitet 1912-1913, as në vitin 1945 por të gjitha këto në vitet 1998-1999.
Ka një thirrje në kushtrim për çdo shqiptar ti dalë zot interesit tonë kombëtar pasi pikërisht se nuk është mbrojtur ky interes, Shqipëria është rrokullisur dhe rrokulliset çdo ditë.
As një interes tjetër i qyetetarëve shqiptar nuk mund të mbrohet nëse nuk mbrohet interesi kombëtar i tyre.
Ju jeni forumi udhëheqës i PD-së dhe është e domosdoshme që të fillojë menjëherë, të fillojë që nesër një debat për të gjitha këto qëllime, partia duhet të dalë në fushëbetejë, nuk mundet kurrë kush të lozë me fatet e shqiptarëve.
Nuk mundet kurrë kush të barazojë Tiranën me banjalluken apo ta zhndërrojë në atë në Beogradin e vogël. Nuk do mund të ndodhë kjo, nuk mundet kurrë kush asnjëherë të mbajë një parlament që mohon gjakun e derdhur të shqiptarëve në Kosovë”, tha Berisha.
