Analisti Lorenc Vangjeli mendon se askush nuk e di emrin e Presidentit të Republikës dhe atë do ta sjellë nga SHBA-të, sapo të zbresë në Rinas, kryeministri Edi Rama!
I ftuar në emisionin “Të Paekspozuarit” në MCN TV, Vangjeli tha se Presidenti do të zgjidhet vetëm nga vullneti i kryeministrit. Sipas Vangjelit, Rama ka personalitet të shumëfishtë dhe se te figura e presidentit do të shohim edhe alter egon e tij.
“Rama si shkrimtar ka bërë librin “Kurban”. Si aktor filmi ka luajtur në finalen e një filmi humoristik të Mamaqit, ku zbret me helikopter, si njeriu që do të zgjidhte situatën.
Te premten zbret në Rinas, vjen nga SHBA-të dhe dalim te shprehja jote, do të zbresë edhe presidenti nga qielli. Me Ramën, do të zbresë edhe emri i Presidentit!
Pavarësisht se Presidenti zgjidhet me 71 vota, mendoj se do të marrë minimalisht 84, nga të cilat vetëm një votë e vetme është e rëndësishme, ajo e Edi Ramës.
Si me ndihmësit e Berishës, që i di ai cilët do të emërojë nëpërmjet votimit. Presidenti do të zgjidhet me votën tek pullë të Edi Ramës. Cili është Presidenti? Shihni qeverisjen. Rama është person me personalitet të shumëfishtë. Tek ai njeri sheh disa personazhe brenda.
Tek Presidenti, do të shohim një tjetër alter ego të Ramës. Rama do të ketë dikë që mbi të gjitha të mos ketë ambicie politike dhe të pranojë supremacinë e tij.
Një nga trokitjet e para që do të bëjë, shpejt do ti çojë edhe dekretin për të ndryshuar foton e qeverisë”, tha Vangjeli në TPZ.
