Gazetari Artan Hoxha u shpreh mbrëmjen e sotme në emisionin “Opinion” se Nuredin Dumani, i penduari i SPAK, ka dhënë një dëshmi ku implikon një politikan të lartë në një vrasje të ndodhur në Lezhë.
Hoxha tha se dëshmitë e Dumanit duhen verifikuar pasi janë shumë të rënda.
“Dumani, sipas dëshmisë së tij, ka thënë se vrasja e vëllait të një ish-deputeti të PS, është porositur nga një prej 3 politikanëve më kryesorë të vendit. Në Lezhë është vrarë Sandër Ndoka, vëllai i ish-deputetit të PS. Dumani ka thënë se e ka me të dëgjuar se vrasja është porositur nga Ilir Meta.
Tani kjo dëshmi e tij duhet verifikuar, pasi është shumë e rëndë. Dumani në dëshminë e tij ka dhënë shumë emra, ka folur edhe për vrasjet ku ka qenë vetë i përfshirë dhe ia ka faturuar Talo Çelës”, tha Hoxha.
Ndërsa gazetarja Klodiana Lala tha se Dumani ka folur për ekzekutorin e vrasjes së ndodhur në Lezhë dhe nëse rezulton i saktë, atëherë hapet një çështje e madhe. “Çështja është a do të mundet SPAK ti shkojë deri në fund dëshmive të Dumanit, pasi presioni politik është shumë i madh”, tha Lala.
