Një sasi prej 28 kilogramë kanabis është sekuestruar nga policia e Kukësit, që ka arrestuar një 43-vjeçar dhe i ka sekuestruar një makinë dhe para CASH. Një tjetër person është shpallur në kërkim.
“Strukturat e DVP Kukës, në bashkëpunim me Forcën e Posaçme Operacionale në Drejtorinë e Përgjithshme të Policisë së Shtetit dhe Prokurorinë pranë Gjykatës së Rrethit Gjyqësor Kukës, bazuar në informacionet e siguruara në rrugë policore se një shtetas do të shiste një sasi lënde narkotike në qytetin e Kukësit, organizuan operacionin policor të koduar ‘Thirra’. Si rezultat i operacionit u bë arrestimi në flagrancë i shtetasit M. V.(P)., 43 vjeç, banues në Durrës. Gjatë operacionit, në afërsi të tunelit të Thirrës, shërbimet e Policisë ndaluan automjetin tip ‘Ford’, me drejtues shtetasin M. V.(P). Gjatë kontrollit të ushtruar në këtë automjet u gjetën dhe u sekuestruan në cilësinë e provës materiale 28 kilogramë lëndë e dyshuar narkotike kanabis”, njoftoi policia.
Gjatë kontrollit fizik, atij iu gjet dhe iu sekuestrua një sasi tjetër lënde e dyshuar narkotike kanabis.
Po ashtu, u shpall në kërkim E.LL., 32 vjeç, banues në Prosek, Mirditë, i cili shoqëronte shtetasin M.V., me automjetin e tij tip “Nissan”.
Në cilësinë e provës materiale janë sekuestruar lënda narkotike, automjeti tip “Ford”, 2 aparate celulare dhe një sasi parash, që dyshohet se është përfituar nga veprimtaria kriminale.
Vijojnë hetimet për identifikimin dhe vënien para përgjegjësisë ligjore të personave të tjerë të implikuar në këtë veprimtari kriminale, ndërsa materialet i kaluan Prokurorisë pranë Gjykatës së Shkallës së Parë Kukës, për veprën penale “Prodhimi dhe shitja e narkotikëve”, kryer në bashkëpunim, mbyllet njoftimi i bluve.
