Kryetar i Grupit Parlamentar “Aleanca për Ndryshim”, Fatmir Mediu tha se procesi i zgjedhjes së presidentit u paragjykua dhe fundi është i qartë. Nuk la pa thumbuar as Enkelejd Alibeajn dhe Ermonela Felaj për debatin me zhurmë me të cilën nisën konferencën e kryetarëve.
“Mos abuzoni as me kohën e as me nervat tona”, tha ai duke mos fshehur zhgënjimin për mos gjetjen e një konsensusi mes opozitës.
“Nëse do të donim që të kishin një president republike kishim vetëm 3 rrugë. E para të ulnim pozitë e opozitë. Të shqyrtonim propozimet reciproke. Askush nuk është I përjashtuar nga propozimi. Absurde të kërkosh përjashtimin e një pale e të zgjedhësh ti ndërkohë që kushtetuta kërkon konsensus. Nëse nuk do të arrinim, atëherë opozita duhet të mendonte qartësisht. Nuk mund të ngelej opozita në dorë të maxhorancës, Edi Ramës apo Ballës. Në politikë opozitën nuk e bën me marrëveshjen me maxhorancën. Opozita ka njerëz dinjitozë për të qenë president. Këtë duhej të bënte opozita. Të përcaktonte një kandidat, apo dy për ti vënë përballë PS-së, për ti vënë përballë përgjegjësisë që të mos përfundojmë të zgjedhim një president sa për të kaluar radhën. Në rast se nuk ka marrëveshje, marrëveshja që krijon opozita është me oponionin publik. Prandaj më vjen keq që ky proces u kthye në diskutim anormal dhe dua të huazoj fjalët e profesor Artan Fugës. Për fatin e keq gjetëm një opozitë “kashtë e koqe” që nuk diti se ku është e ça bën, për të arritur në një konkluzion që të keni një president si e do maxhoranca”, shtoi ai.
