Nënkryetari i LSI, Petrit Vasili, komentoi në Syri Tv, dështimin e tre raundeve për zgjedhjen e Presidentit të ri të vendit.
Vasili deklaroi se nën dritën e fakteve të reja konfirmuese dhe dërrmuese që vijnë nga Greqia dhe që kanë lidhje me deklaratën e Dendias për kufirin detar, i gjithë procesi që kemi parë për kreun e ri të shtetit ishte një farsë tradhtare e qeverisë për të bërë zhurmë.
“Ka qenë shumë e qartë që Rama do çojë instrumentin, gjymtyrën e tij në Presidencë që të realizojë atë skenar me detin që nuk e ka realizuar dot për shkak të qëndrimit të Presidentit Ilir Meta.
Rama është një arrogant dhe i çekuilibruar psikologjikisht dhe kërkon të imponojë autoritete. Ai shikonte te Meta pengesën e pakapërcyeshme për të shitur kufijtë, ndërkohë qëndrimi i Metës ka qenë i palëkundur, Kushtetues dhe patriotik”, tha Vasili.
Vasili theksoi se vrulli propagandistik ka rënë pasi letrat u hapën ndërsa shtoi se populli do të jetë përballë të gjithë tradhtarëve, kryeministër apo president qoftë ai.
“Kemi të bëjmë me një tradhti të Ramës. Në emër të përfitimeve personale po shiten kufijtë e Shqipërisë.”-deklaroi Vasili.
