Nga dita e djeshme, kur Këshilli Kombëtar i PD zgjodhi 20 anëtarët e Kryesisë, Komisioni i Rithemelimit ka pushuar së funksionuari.
Ky Komision u ngrit nga Kuvendi i 11 dhjetorit, i mbajtur në Air Albania, ku u vendos shkarkimi i Lulzim Bashës si kryetar i PD, si dhe forumeve drejtuese të kësaj partie, përfshi këtu edhe Sekkretariatin.
Për të drejtuar PD u vendos ngritja e një Komisioni që u pagëzua me emrin “Rithemelim”, ndërsa në përbërje të tij ishin 29 anëtarë. Nga momenti i miratimit, ky Komision mori vendimet në emër të PD, përfshi këtu thirrjen e Kuvendit të 30 prillit, apo organizimin e atyre që u konsideruan primare për zgjedhjen e 6 kandidatëve për Bashkitë ku me 6 mars u mbajtën zgjedhjet e pjesshme vendore.
Ishte po Komisioni i Rithemelimit qi i paraqiti Këshillit Kombëtar listën me 47 emrat e kandidatëve pvr 20 vendet e kryesisë së kësaj partie.
Në procesin e votimit morën pjesë 227 anëtarë të Këshillit Kombëtar, ndërsa mungonin rreth 30 deputetë që janë pozicionuar si mbështetës të Enkelejd Alibeajt, ose si një grupim asnjëanës.
Rezultati u bë publik nga Abana Vokshi, kryetare e komisionit zgjedhor PD, ku më i votuari ishte Belind Këlliçi me 192, i ndjekur nga Flamur Noka me 166 e Oerd Bylykbashi me 148, teksa në radhët e grave më e votuara ishte Fatbardha Kadiu, e ndjekur nga Ina Zhupa e më pas Jozefina Topalli.
Edhe pse ishin anëtarë të rithemelimit emrat si Genc Pollo, Edmond Spaho, Tritan Shehu, Çlirim Gjata, nuk rezultuan fitues, teksa edhe i rikthyeri në PD Arben Imami nuk u bë pjesë e kryesisë.
Dy nënkryetarët e PD dhe sekretari përgjithshëm e sekretariatet do të zgjidhen në vijim nga Këshilli Kombëtar, ndërkohë që kryetari i PD Sali Berisha, Edi Paloka, kryetari i Këshillit Kombëtar si dhe drejtuesit e Forumit Rinor dhe Lidhjes Demokratike të gruas sipas statutit janë automatikisht pjesë e kryesisë.
