Një tjetër shtëpi bari është zbuluar këtë herë në Kurbin nga policia, që ka arrestuar pronarin.
Gjatë aksionit, janë sekuestruar 57 kg bimë të dyshuara narkotike, të grira e të vendosura në proces tharjeje brenda banesës si dhe 100 bimë të dyshuara narkotike, të kultivuara jashtë saj.
Aksioni i koduar “Light” erdhi pas një hetimi proaktiv disajavor.
Në panga u vu Y.T., 29 vjeç, banues në lagjen “Drita”, Mamurras, për veprat penale “Kultivimi i bimëve narkotike” dhe “Prodhimi dhe shitja e narkotikëve”.
“Gjatë kontrollit të ushtruar brenda banesës së 29-vjeçarit që e kishte përshtatur si magazinë, shërbimet e Policisë gjetën dhe sekuestruan në cilësinë e provës materiale, 57 kg bimë të dyshuara narkotike cannabis sativa, të grira e të vendosura në proces tharjeje. Në vijim të kontrollit u sekuestruan edhe 100 bimë të dyshuara narkotike cannabis sativa, të cilat u gjetën të kultivuara në ambientet e jashtme të banesës së shtetasit Y.T.”, njoftoi policia.
