Vendimi për rekurset/ Berisha: Po përgatitet skema mafioze, Rama përfiton miliona

Një vendim i qeverisë për heqjen dorë ndaj rekursit në Gjykatën e Lartë për disa çështje, për Sali Berishën është një aferë e madhe.

Në një prononcim për media një ditë më parë pas mbledhjes së qeverisë, ministri i Drejtësisë Ulsi Manja bëri me dije se vendimi vjen për të lehtësuar këtë gjykatë nga disa dosje, të cilat kanë të bëjnë me rekurse kryesisht civile dhe administrative.

Por, për ish-kryeministrin Sali Berisha, ky është një lloj “tenderi”, nga i cili kryeministri Edi Rama do vjelë miliona: “Të hapim (qeveria) tenderin e fundit të turpshëm që të vjelim miliona euro në çështjet civile duke ia u faturuar në kurriz taksapaguesve shqiptarë”.

“Imagjinoni mafia e tmerrshme e tokave e pronave amnistohet, shkon më në Gjykatë të Lartë, mjafton të çojë qesen se çështjen ja ka zgjidhur Rama”, akuzoi kreu i PD-së.

Berisha u shpreh po ashtu se nënkryetari i Gjykatës së Lartë, Sokol Sadushi, i cili në kushtet kur s’është zgjedhur kryetari, drejton gjykatën, është palë në këtë vendim.

“Qeveria po koordinohet me Gjykatën e Lartë për të krijuar favore për individë të caktuar, pas këtij vendimi qëndrojnë klane mafioze të tokave, territoreve, kontrabandës e me radhë, e me radhë”, tha Berisha këtë të Premte, në një deklaratë për mediat.

“Vlerësimi për rreth 3800 dosje do bëhet nga ushtarët e partisë. E sigurt dora e zezë e Delinës (Delina Fico) me west institute që të gjithë militantë të PS të klubit juridik Qemal Stafa do përzgjedhë përsosmërisht kundrejt ryshfeteve se kush do falet e kush jo. S’ka nevojë për gjykatës, tani dalin delinistët”, shtoi ai.

“Ky vendim është përgatitur nga Sadushi me Agaçion (Engjël Agaçi)”, tha Berisha.