Rreth 200 familje në rrugën Besim Alla në Tiranë vuajnë mungesën e ujit në rubinetat e çezmës. Ato furnizohen me ujë pusi, i cili pas analizave të ISHP nuk mund të përdoret për shkak të ndotjes që ka. Në kushte të tilla, zgjidhja e vetme mbetet furnizimi me bote, që u garanton 1 orë ujë në mëngjes dhe po kaq në mbrëmje.
E gjithë situata ndodh ndërsa Bashkia e Tiranës e drejtuar nga Erion Veliaj vijon me show dhe propagandë mbi ndryshimet që po pëson kryeqyteti, ndërsa Kryeministri Edi Rama shfaqet në rrjete duke pirë ujë nga rrjeti i UKT, si për ti mbushur mendjen qytetarëve se ky ujë konsumohet.
Edhe sikur të merret i mirëqënë konkluzioni i Ramës, në të gjithë Tiranën janë me mijëra familje që nuk marrin furnizim me ujë të pijshëm, edhe pse premtimi edhe në zgjedhjet e fundit ishte garantimi i furnizimit për 24 orë.
Në fakt ajo që ndodh në realitet është shumë larg asaj që thuhet për propagandë qoftë nga Bashkia ashtu edhe nga Qeveria.
200 familjet në rrugën Besim Alla, apo siç njihet rruga e Qelqtë nuk kanë ujë, ndërsa çdo muaj paguajnë faturat e UKT nga 18 në 20 mijë lekë të vjetra.
Dhe nuk paguajnë për ujin e rrjetit, por për ujin që marrin nga pusi. Bazuar te denoncimet e banorëve, distanca që u garanton ujin nga rrjeti i UKT është më pak se 20 metra, pra duhet që Ujësjellësi të shtrojë një tub.
Banorët shprehen se rruga është e pashtruar, që do të thotë se sot mundësia për zgjidhjen e problemit është shumë herë më e lehtë se në rastet kur mund të kishte një rrugë të asfaltuar.
Nuk bëhet fjalë për furnizim 24 orësh me ujë, pasi atë vështirë se e kanë edhe zonat më qendrore të Tiranës, por një furnizim që të plotësojë nevojat bazike të qytetarëve, veçanërisht në një periudhë vere.
Për ta zgjidhur këtë situatë duhet pak vullnet, mjafton që Kryebashkiaku i Tiranës të kuptojë që territori që ka në administrim është më i madh se sheshi Skënderbej, Bulevardi Dëshmorët e Kombit apo se Unaza e vogël e Tiranës.
