Gjykata e Lezhës ka dënuar me nga një vit burg tre persona, në lidhje me tjetërsimin e pronave në zonën e Ranës së Hedhun në Shëngjin.
Kjo cështje ndaj vëllezërve ishte vecuar nga Prokuroria, për shkak se vëllezërit e akuzuar nuk ndodhen në Shqipëri.
Vasil Frroku, Martin Frroku dhe Ndue Frroku janë gjetur fajtor për veprën penale të falsifikimit të dokumenteve.
Gjyqtarja e cështjes doli në përfundimin se vëllezërit kanë konsumuar veprën penale në fjalë dhe i ka dënuar ata në mungesë. Vëllezërit janë dënuar si pjesë e të njëjtës cështje, ku është dënuar edhe ish-kryebashkiaku i Lezhës, Fran Frrokaj.
Vëllezërit kanë përfituar nga një mijë metër katror prona në zona bregdetare të Lezhës.
Gjykata e Shkallës së Parë në Lezhë ne muajin shtator të vitit 2020 shpalli fajtor dhe dënoi me 4 vite burg për “Shpërdorim detyre” Frrokajn, ndërsa bashkë me të u dënuan edhe 16 persona të tjerë, përfshirë Gjon Ndokën, xhaxhai i ish-deputetit të Partisë Socialiste.
Por, vendimi u kthye pas nga Gjykata e Apelit në Shkodër për proces të parregullt.
Pas rekursit të prokurorisë Gjykata e Lartë e dërgoi çështjen për rigjykim në Gjykatën e Apelit në Shkodër. Hetimet për tjetërsimin e pronave në zonën e “Ranës së Hedhun” në Shëngjin kanë nisur në vitin 2017-të, kur në Prokurori u denoncua tjetërsimi i 234 mijë e 548 metër katrore tokë shtetërore ranishte.
