Partia Socialiste ka bllokuar me vota në Kuvend kërkesën për mocion me debat për rrugëtimin europian të Shqipërisë.
Kërkesa u paraqit në Kuvend nga një grup deputetësh të opozitës, pas paralajmërimeve të Kryeministrit Edi Rama në disa dalje publike, kur foli për ndryshime kursi, nëse nuk do të kishte një hapje negociatash mes BE dhe Shqipërisë në muajin qershor. Rama tha se do të shikohet mundësia për të paraqitur kërkesën për ndarjen e Shqipërisë nga Maqedonia e Veriut, nëse muri bullgar, sikundër u shpreh Kryeministri për veton e vendosur nga Bullgaria ndaj Maqedonisë së Veriut, nuk do të rrëzohej.
“Sigurisht të thuash që ne do të ndryshojmë menjëherë kurs se këtë porosi kemi marrë nga këshillimi kombëtar është sa antikushtetues, e antiligjore dhe provokative. Këto i thonë vetes rilindës, por rilindësit thoshin që dielli për Shqipërinë lind nga perëndimi, por për ju lind natyrshëm nga lindja. Nuk është histori patronazhistësh kjo”, tha Petrit Vasili.
Arsyet se përse dhanë votat kundër i shpjegoi Taulant Balla, i cili u shpreh se vendi ynë nuk mund të mbahet peng nga ngërçi Maqedoni e Veriut-Bullgari. Por ky nuk ishte argumenti i vetëm që bindi PS-në për të ngritur kartonët e kuq.
‘Këtu tani vijnë këta. E kush këta. Këta që një pjesë e kësaj salle thonë që Shqipëria po ndryshon kurs. Shqipëria nuk ka plan b, ka vetëm plan a. Plan b keni ju të ashtuquajtur sovranista që e keni kthyer antiamerikanizmin në doktrinë dhe për këtë ne nuk ju shërojmë dot. Ju jeni shoqata e non gratave në Ballkan. Mbani qëndrime që nuk ju kupton askush’, u shpreh Balla.
Shqipëria shpreson që brenda presidencës franceze të Unionit, të marrë dritën jeshile për t’u ulur në tryezën e parë ndërqeveritare të negociatave me Brukselin.
