Nga Boldnews.al
Bashkia e Elbasanit ka shpallur kompaninë “Timac” fitues të tenderit me vlerë mbi 100 milionë lekë të vjetra, në kundërshtim me kriteret që vetë kishte përcaktuar fillimisht në dokumentat e prokurimit publik.
Por, që të justifikonte procedurën, Bashkia e drejtuar nga Gledjan Llatja, ka bërë një modifikim “të vogël”, e cila shkonte në favor të shoqërisë fituese.
Në mesin e Prillit 2022, Bashkia Elbasan shpalli tenderin “Blerje mjete teknologjike për pastrim”, me fond limit 10.8 milionë lekë të reja pa TVSH.
Në përfundim të procedurës, Bashkia Elbasan shpalli fitues kompaninë “Timac”, e cila ishte edhe konkurrentja e vetme në garë, referuar dokumentave zyrtare.
Rezultati i këtij tenderi është i shoqëruar me dyshime për favorizim.
“Boldnews.al” ka shqyrtuar të dhënat e procedurës dhe ka konstatuar anomalinë.
Në Kriteret e Veçanta të Kualifikimit të dokumentave standarte të tenderit, e konkretisht në “Kapacitetin Ekonomik dhe Financiar”, Bashkia Elbasan ka parashikuar që operatori që do të shpallej fitues, do të duhej “që të paraqesë bilancet vjetore, për vitet financiare 2019, 2020, 2021, të shoqëruara me Akt Ekspertizën e Ekspertit Kontabël të Autorizuar…”.
Kompania “Timac” nuk ka mundësi logjike që të përmbush këtë kriter.
Sipas të dhënave të Qendrës Kombëtare të Biznesit, shoqëria private “Timac” është krijuar në Maj të vitit 2020.
Pra, më së paku, ajo nuk kishte asnjë mundësi reale për të dorëzuar bilancet e vitit 2019, pasi në atë kohë nuk ekzistonte.
Por, çfarë ka ndodhur?
Në proces-verbalin “Për argumentimin e kritereve të përgjithshme dhe të veçanta të kualifikimit”, që mban datën 14 Prill 2022, Bashkia e Elbasan ka përcaktuar se “Operatorët ekonomikë duhet të paraqesin bilancet vjetore, për vitet financiar 2020, 2021, të shoqëruara me Akt Ekspertizën e Ekspertit Kontabël të Autorizuar…”.
Pra, në këtë proces-verbal, është hequr detyrimi për dorëzimin e bilanceve për vitin 2019.
Dhe, në këtë mënyrë, shoqëria “Timac” plotësonte kushtet dhe, në përfundim, u shpall edhe fituese.
Shoqëria fituese është në pronësi të Eneida Puca dhe është me seli në “Tirana Industrial Park”.
Në shoqëri me emër të ngjashëm, “Timak” (pra, me shkronjë fundore “K”), është në pronësi të motrës së saj, Arjeta Puca.
Kompania private e Arjeta Pucas është krijuar në vitin 2016 dhe ka disa vite që operon në tregun e mjeteve për qëllime të veçanta, përfshirë edhe autoambulanca.
Por, në tenderin e Bashkisë së Elbasanit është përfshirë kompania më e re e familjes Puca, “Timac” shpk, e cila kishte nevojë për një “dorë” nga administrata e Gledjan Llatjas që të fitonte tenderin për blerjen e mjeteve teknologjike nga Bashkia e Elbasanit.
