Kuvendi i Shqipërisë, ashtu sikundër pritej, ka djegur edhe raundin e dytë të zgjedhjes së Presidentit, pa pasur një kandidat.
Në kushte të tilla, pritet që raundi i tretë të mbahet më 30 maj, ku sërisht mazhoranca e Kryeministrit Edi Rama nuk do të paraqesë një kandidaturë, duke e justifikuar këtë me faktin se raundet që kërkojnë një shumicë të cilësuar i janë lënë opozitës për të propozuar një emër.
Deputeti Enkelejd Alibeaj, megjithëse nuk kishte mbështetjen e Komisionit të Rithemelimit, zhvilloi një proces negociatash me socialistët, që përfaqësoheshin nga Taulant Balla, Elisa Spiropali dhe Damian Gjiknuri. Gjithsesi negociatat, ashtu sikundër kishte paralajmëruar Komisioni i Rithemelimit ishin një farsë, ndërsa ata akuzuan Alibeajn se po bënte lojën e Edi Ramës.
Në një prej takimeve që Alibeaj zhvilloi me një grup deputetësh demokratë u propozuan 8 emra si kandidatë për deputetë, një pjesë e të cilëve u tërhoqën, duke lënë të nënkuptohej se nuk ishin të interesuar ose emrat e tyre ishin lakuar pa u konsultuar më parë.
Alibeaj shpresonte se një nga emrat që ishte propozuar do të merrte mbështetjen e deputetëve të PS, por një gjë e tillë u hodh poshtë nga Taulant Balla në emër të Grupit Parlamentar socialist, dhe kjo u konsiderua si shkelje e marrëveshjes.
Ai tha se nuk do të ketë më diskutime me maxhorancën. Kjo e fundit nga ana tjetër ka theksuar se nëse opozita nuk sjell propozimet, atëherë ata do e zgjedhin të vetëm Presidentin në raundin e 4-rt, ku Kushtetuta parashikon që Kreu i ri i Shtetit të zgjidhet me 71 vota.
Gjithsesi nga ana e socialistëve nuk ka asnjë emër publik se kush mund të jetë Presidenti i ri i vendit, ndërsa Kryeministri Edi Rama ka shuar shpresat e ligjvënësve socialistë se ndonjë prej tyre mund të merrte detyrën e Kreut të Shtetit.
Mes socialistëve qarkullojnë një seri emrash si kandidatë, që janë propozuar nga deputetët përmes zarfeve që depozituan pak javë më parë në një mbledhje të Grupit Parlamentar, ku një pjesë e tyre i përkasin pikërisht deputetëve. Jashtë Grupit parlamentar socialist disa nga emrat që kanë qarkulluar meditiakisht janë nga Fatos Nano, ish-lideri historik i PS, te Gramoz Ruçi që dorëzoi mandatin e deputetit pas 25 prillit, Valentina Leskaj, ish.deputete e PS, Zef Mazi diplomat karriere, dhe deri te ish-Kryeprokurorja Ina Rama, e cila sot është një nga anëtaret e KPA. Gjithsesi ajo që dihet është se emrin e ardhshëm të Presidentit të vendit duket se Kryeministri Edi Rama po e ruan me fanatizëm, duke shmangur debatet qoftë me grupin parlamentar, ashtu edhe një debat publik.
