Deputetja demokrate Albana Vokshi akuzoi sot nga foltorja e Parlamentit se marrëveshja për Butrintin zgjodhi pasurimin e një grupi njerëzish për të ndërtuar një kompleks turistik, me 630 vila të oligarkëve të Edi Ramës.
Vokshi tha se janë 830 ha që u nxorrën jashtë zonës së mbrojtur të Parkut të Butrintit për ti hapur rrugën ndërtimit të kompleksit turistik.
Deputetja demokrate e krahasoi këtë marrëveshje me atë të ndodhur në vendin ku ishte Teatri Kombëtar,mes Qeverisë dhe Firmës Fusha, ku do të ndërtoheshin kullat.
“Ky vendim i Ramës për ti hequr Parkut të Butrintit 830 ha është një tjetër krim, identik sikundër ndodhi me Teatrin, ku fillimisht iu hoq mbrojtja kulturore, më pas në kulmin e pandemisë, u shemb godina, për ti hapur rrugën ndërtimit të kullave”, tha Vokshi.
Ajo tha se Edi Rama duhet të japë llogari për këtë aferë kriminale ku ai është i përfshirë. Duke iu referuar konventave ndërkombëtare, Vokshi tha se e gjithë zona, përfshi edhe atë që Rama e ka nxjerrë jashtë Parkut të Butrintit është zonë e mbrojtur.
Vokshi i bëri thirrje SPAK të hetojë aferën korruptive, të cilën Kryeministri po e mbron pavarësisht kundërshtive të profesionistëve të fushës.
“Edi Rama ka injoruar edhe Institutin Kombëtar të Trashëgimisi Kulturore, duke ia lënë në dorë ndërtuesit të 630 vilave që të bëjë vlerësimin arkeologjik të zonës”, tha Vokshi. Sipas tij, që nga dita e parë e ligjit për investimet strategjike Rama ka pasur si qëllim grabitjen e pronave publike.
