Deputetja Albana Vokshi, e cila drejton gjithashtu edhe Komisionin e Operacioneve Elektorale, tha se procesi për zgjedhjen e kreut të PD po ecën normalisht.
Vokshi tha se ka një interesim të madh të anëtarëve për të votuar, madje fluksi i lartë është parë që në orët e para të procesit.
Deputetja tha se deri në orën 11:00 kanë marrë pjesë në zgjedhje mbi 14 mijë anëtarë.
“Lista me të cilën është punuar është ajo e 2019, por e kemi deklaruar se ishte një listë fiktive. Në referendumin e 18 dhjetorit kanë votuar demokratët që kishin kartat që nga 1990. Kështu ndodhi edhe me primaret, po ndodh edhe sot”, tha Vokshi.
Ajo u shpreh se nuk ka një numër të saktë të anëtarësisë së PD, por shtoi se në referendumin morën 43 mijë anëtarë, ndërsa në primaret kanë marrë pjesë mbi 39 mijë anëtarë.
Vokshi tha se votat do të numërohen në qendrat e votimit, nga Komisionet, në prani të vëzhguesve dhe mediave.
“Të dhënat do të përcillen në rrugë elektronike në qendër dhe ne do të japim rezultatet paraprake”, tha Vokshi. Sipas saj, sot është një ditë e rëndësishme për Shqipërinë, pasi po ushtrohet e drejta demokratike në mënyrë të drejtëpërdrejtë.
VOTUESIT SIPAS QARQEVE
Shkodër- 1287 votues
Lezhë- 830 votues
Kukës- 1081 votues
Dibër- 650 votues
Durrës- 1005 votues
Tiranë- 3694 votues
Elbasan- 1990 votues
Berat- 460 votues
Korçë- 1200 votues
Fier- 1520 votues
Vlorë- 570 votues
