Nga Boldnews.al
Grupimi i Bashës që sot përfaqësohet nga Enkelejd Alibeaj, kishte të fundit shans në duar për të bërë “dill” me Ramën, në interesin e përbashkët. U duk se të dyja palët patën alkimi, për të vijuar një histori “rozë” në politikë, ku në mes është çështja e zgjedhjes së presidentit të ri.
“Kokat e mëdha” të grupimit Basha u menduan gjatë për të propozuar emrat e kandidatëve për president. Tetë të tillë listuan, duke trumbetuar me të madhe se tashmë në bashkëpunim me PS-në dhe grupet e tjera Parlamentare, do të zgjidhnin njërin prej tyre. Mundi u shkoi kot dhe në fund kuptuan se e gjitha ishte jo një lojë politike, por një injorim deri në përçmim të të pandreqëshmve që ende u besojnë “marreveshjes” me Ramën.
PS po shkon drejt zgjedhjes së presidentit që do Rama. Marrëveshja ishte gojore mes Alibeajt dhe Ballës. Në fillim u ra dakord që Alibeaj të propozonte emrat e kandidatëve, në raundin e dytë dhe të tretë dhe PS të vendoste. Tashëm doli varianti përfundimtar se PS nuk mund të jetë notere e kandidatëve të propozuar nga grupimi Basha dhe qartësisht është lënë të kuptohet se kreu i shtetit do zgjidhet i vetëm nga Rama.
Po çfarë luhej përtej karriges së kreut të shtetit? Basha dhe të tijët panë edhe një herë “ëndërr” sikur do bëheshin faktor. Me vulën e ngjashur në xhep, partia shëtitëse me aksin e shkurtër godinë e PD-së-Parlament, do të kthehej në faktor serioz për ti ofruar vendit një president antikomunist dhe jashtë vathës së PS-së.
Me këtë kartë në duar, gjithnjë nëse do e realizonin, ëndrra vijonte duke e zgjeruar aksin e udhëtimit, e shumta deri në Rrugën e Elbasanit, ku do të faleshin pranë një ambasade me peshë. Po në të ardhmen do mburreshin se e “imponuan Ramën” të pranonte presidentin e propozuar prej tyre, më tej ashtu me vulën në xhep të paktën për disa muaj do vëtëquaheshin faktor i rëndësishëm në Parlament dhe politikë.
Forcën e tyre në elektoratin e djathtë ata e dinë mirë, për aq kohë se asnjë prej tyre nuk kalon as natën në zonat ku janë zgjedhur deputetë. Gjithsesi për grupimin dhe mbështetësit e Bashës, që thonë se ka nisur fushatë nëpër fshtra, por askush nuk e ka parë, ky ishte zhgenjimi i radhës. Por ata nuk heqin dorë, tashmë të mësuar po kalojnë në “Sindomin Rama” ku dashurohen me pengmarrësin dhe e kanë të vështirë të ikin prej tij edhe kur i përzë.
Ndërsa Alibeajm me shokët e tij Bashistë do mbajnë mbledhje të gjata mes vetes, që asnjëherë nuk i kalon 18 deputetë, në anën tjetër Rama po përjeton ekstazën e radhës, pikërisht nga kënaqësia që i jep mashtrimi nëpërmjet gjoja marrëveshjeve. Pazëlli i kreut të shtetit do të plotësohet nga vetë Rama.
Ai e di sa i/e gjatë do jetë kreu i shtetit, ngjyra e flokëve, ushqimi që preferon, çfarë sporti pëlqen e madje edhe sa e ka numrin e këmbës. Të tjerat ishin vetëm ëndrra pranverore e grupimit Basha që edhe një herë mendoi se ishte faktor.
