Aleanca për Mbrojtjen e Butrintit ka zhvilluar një tryezë diskutimi me ekspertë të fushave të ndryshme në Shqipëri lidhur me cështjen që ka ngjallur shumë diskutime javët e fundit, dhënien me koncension të Parkut Kombëtar të Butrintit.
Teksa folën mbi problematikat mjedisore, ata kërkuan transparencë për atë që po ndodh me atë që cilësohet si vlerë kombëtare e vendit tonë.
“E di kush është fondacion i vërtetë sot që do marrë Butrintin nesër? Janë vetëm pesë veta”, tha Neritan Ceka.
Ndërsa avokatja Adriana Kalaja theksoi se cështja e Butrintit duhet të shkojë në SPAK.
“Unë mendoj se cështja e Butrintit duhet të shkojë në SPAK”, tha Kalaja.
Aktivistë të tjerë deklaruan se nuk gjejnë rast të ngjashëm të këtij lloj partneriteti mes privatit dhe publikut. Ata thanë se duhet që të bëhet për këtë kauzë edhe udhëtim në Sarandë e në Butrint.
Ekspertët thanë se për atë që po ndodh me Butrintin nuk janë marrë fare konsulta, ndërsa shprehen se duan të mbrojnë kulturën e vendit tonë.
Regjisori Edmond Budina nënvizoi se mafia në pushtet është duke vjedhur kulturën.
“Mafia që është në pushtet po na vjedh kulturën. Kjo kauzë është emergjencë kombëtare”, tha Budina.
Të tjerë aktivistë thanë se qeveria ka për qëllim të shkatërrojë identitetin dhe trashëgiminë shqiptare.
Pedagogu Edmond Tupja tha se koncesione është vdekje për artin. Ai shtoi se ka frikë se gjithë Shqipëria, gjithë kultura jonë do jepet me koncension.
