Nga Boldnews.al
Shefi i Krimeve në Komisariatin e Lezhës, Leonard Palushi, i arrestuar në kuadër të operacionit të SPAK-ut, “Golden Bullet”, ku u goditën disa grupe kriminale, më herët ka pasur një detyrë shumë të rëndësishme në Elbasan-atë të mbledhjes së informatave për përfshirjen në korrupsion të gjyqtarëve dhe prokurorëve që ishin në Veting.
Struktura e Posaçme Kundër Korrupsionit dhe Policia e Shtetit njoftuan mesditën e së Enjtes (19 maj 2022) se kanë arrestuar 18 persona, mes të cilëve edhe efektivin Palushi.
Ai dyshohet se ka dekonspiruar operacionet policore për llogari të anëtarëve të grupeve kriminale.
Dy vjet më parë, “Boldnews.al” ka raportuar për përfshirjen e Palushit në një “detyrë specifike”, atë të mbledhjes së informacioneve kompromentuese mbi zyrtarët e sistemit të drejtësisë.
Oficerët Leonard Palushi dhe Bedri Hasanaj, së bashku me drejtues të tjerë të uniformave blu, ishin ngarkuar nga Drejtori i Policisë së Qarkut në atë kohë, Arjan Muça, për të raportuar mbi vendimet e prokurorëve dhe gjyqtarëve që u duken si korruptive.
Redaksia siguroi në atë kohë mesazhin që drejtori Muça u ka dërguar vartësve të tij, në një grup në “Whatsapp”.
Në mesazhin e drejtorit të Policisë, të siguruar nga “Boldnews.al”, thuhet:
“Të nderuar shefa! Deri në orën 14 të ditës së sotme, duhet të dërgoni me shkrim në adresën e Leonard Palushit, problematikat që keni pasur me prokurorët dhe gjyqtarët, lidhur me vendime që ju i dyshoni si korruptive për 5 vitet të fundit, duke dërguar çështje konkrete dhe emrin e prokurorit apo gjyqtarit. Detyra duhet realizuar me seriozitet dhe korrektësi. Flm!”
Pra, duket qartë që oficeri Leonard Palushi ka pasur një rol të rëndësishëm në mbledhjen dhe koordinimin e informacioneve për gjyqtarët e prokurorët.
Por, siç rezulton nga hetimi i SPAK-ut, ai vetë nuk duket se ka qenë imun ndaj përfshirjes në veprime antiligjore.
