Deputeti i Partisë Demokratike dhe anëtari i Komisionit të Rithemelimit, Luçiano Boçi ka reaguar pas marrëveshjes së arritur nga Enkelejd Alibeaj me mazhorancën për zgjedhjen e presidentit të ri.
Në një prononcim për gazetarët, Boçi tha se marrëveshja është antikushtetuese. Sipas tij, Alibeaj s’ka tagër për negociata në emër të Partisë Demokratike.
Ai shtoi se askush s’ia heq dot të drejtën opozitës të propozojë kandidatë në të pestë raundet
“Niveli i diskutimit kaq qesharak e tallës. Çdo negociatë duhet të jetë në përputhje me Kushtetutën. Vendimi i sotëm antikushtetues. Askush s’ia heq dot të drejtën opozitës të propozojë kandidatë në të pestë raundet. Ironia është që është opozita, e cila nuk ka votat për një numërim të thjeshtë. Ndërsa, mazhoranca që i ka këto vota e ruan e propozimin e saj në raundin e katërt dhe të pestë kur votimi është me shumicë të thjeshtë. Negociatat duhet të vazhdojnë në nivel politik. Konferenca e Kryetarëve e kryen detyrën me vendosjen e datave të raundeve. Më pas negociatat janë tërësisht politike. Alibeaj me bashkëshoqëruesit e tij nuk ka asnjë lloj mandati të dhënë nga partia, apo grupi Parlamentar”, tha Boçi.
