Gjykata e Apelit të Tiranës ka regjistruar ankimin e Komisionit të Rithemelimit ndaj vendimit të gjykatës së Tiranës që pranoi ankimin e Enkelejd Alibeajt, lidhur me çështjen e njohjes së Kuvendit të PD-së zhvilluar më 11 Dhjetor dhe vendimet e marra aty.
Më 25 mars, gjyqtari i Tiranës Agron Zhukri njohu Kuvendin e zhvilluar në “Air Albania” që vendosi shkarkimin e Lulzim Bashës si kryetar i PD dhe marrjen e drejtimit të partisë nga “Komisioni i Rithemelimit”.
Vendimi u ankimua nga Alibeaj dhe u pranua nga gjyqtarja e Tiranës Blerina Muça më 22 Prill.
Po në Gjykatën e Tiranës u bë kundërankim ndaj këtij vendimi nga Komisioni i Rithemelimit.
Këtë të Martë, Gjykata e Apelit të Tiranës njofton se u depozitua pranë Gjykatës së Apelit Tiranë çështja e mësipërme dhe aktet e sipërcituara.
Po sot, u hodh shorti që përcaktoi se relatore e çështjes do të jetë Elona Toro. Pjesë e trupës gjykuese do jenë dhe Edlira Petri e Genti Shala.
Gjykata po ashtu, dënon dhe deklaratat politike të palëve ndaj gjyqësorit:
“Referuar deklaratave tashmë të bëra publike, që shkojnë përtej debatit të brendshëm partiak, apo edhe opinioneve të shfaqura lidhur me këto zhvillime, Gjykata e Apelit Tiranë, e përgjegjshme për funksionin që i është ngarkuar, konsideron të papranueshëm çdo reagim dhe deklarim paragjykues, sulmues apo denigrues që synon të ushtrojë ndikim në marrjen e një vendimi të caktuar mbi këto çështje. Për një shtet të së drejtës, sulme të tilla ndaj gjyqtarëve dhe gjykatave, të cilat perceptohen si ndërhyrje e drejtpërdrejtë në veprimtarinë gjyqësore përpara marrjes së vendimeve prej tyre, janë të papranueshme ligjërisht dhe kushtetutshmërisht”.
