Gjyqtari i Gjykatës së Tiranës Kastriot Gramshi duhet të shkarkohet nga detyra. Në këtë përfundim arrin Operacioni Ndërkombëtar i Monitorimit (ONM).
Kastriot Gramshi u konfirmua në detyrë nga Komisioni i Pavarur i Kualifikimit më 25 Mars të këtij viti, pavarësisht problematikave të shumta që u konstatuan gjatë dy seancave dëgjimore lidhur me pasurinë e gjyqtarit të Tiranës. Vendimi u dha nga trupa gjykuese trupa e përbërë nga Suela Zhegu, Brunilda Bekteshi dhe Firdes Shuli.
Por këtë të Hënë, ONM i ka rekomanduar Komisionerëve Publikë (IKP) ankimin e vendimit të dhënë nga shkalla e parë e vetingut.
Në një njoftim të publikuar ditën e sotme, IKP njofton se Komisionerët Publikë janë duke shqyrtuar në të njëjtën kohë vendimin e Komisionit të Pavarur të Kualifikimit dhe rekomandimin e Operacionit Ndërkombëtar të Monitorimit.
ONM: Kastriot Gramshi nuk justifikon pasurinë
Sipas ONM-së, vendimi i KPK-së që konfirmon në detyrë Kastriot Gramshin ka mangësi të rënda logjike dhe faktike në pjesën e arsyetimit.
Operacioni ndërkombëtar i Monitorimit e cilëson rivlerësimin e pasurisë së gjyqtarit të Tiranës një proces të pasaktë.
ONM kërkon që vendimi i KPK-së të ankimohet nga Komisioneri Publik dhe gjyqtari të shkarkohet nga detyra.
“ONM beson se një konsiderim i duhur i komponentit të aktivit në tërësinë e tij duhet të rezultojë në shkarkimin e të rivlerësuarit pasi ai nuk arrin një nivel të besueshëm të vlerësimit të pasurisë… ONM gjithashtu beson se besimi i publikut mund të ndikohet nga një vlerësim i përgjithshëm i mangësive të theksuara. Duke pasur parasysh sa më sipër, ONM rekomandon apelim kundër Vendimit të KPK për këtë rast”, thuhet në konkluzionet e ONM-së pas shqyrtimit të vetingut të Kastriot Gramshit.
