Kryetari i PDIU, Shpëtim Idrizi është prononcuar për mediat pas takimit që pati me Taulant Ballën në kryesinë e Kuvendit për zgjedhjen e presidentit të ri.
Idrizi ka deklaruar se Presidenti i ri duhet të ketë eksperiencë politike, duke dalë kështu në kundërshtim me draftin e propozuar nga Enkelejd Alibeaj, që ndër pikat e saj thekson se Kreu i ri i Shtetit jo domosdoshmërisht duhet të jetë person politik.
“Theksuam që presidenti duhet të jetë një person thellësisht me eksperiencë politike. Është njeriu që përfaqëson unitetin e kombit. Sigurisht që një president që mbart konsensus do ta luante shumë më mirë këtë rol. Gjetëm një vullnet të mirë vlen për të verifikuar këtë gjë, që nuk do të kemi një president të zgjedhur njëanshëm nga mazhoranca. Do të ftoja të gjitha palët që ne kërkojmë një president për palët dhe duhet të na bashkojë figura. Patëm një dakordësi me përfaqësuesit e PS-së që ka ardhur koha të flasim me emra konkretë. Duhet t’i japim shqiptarëve një president me peshë publike sepse politika shqiptare krijon shumë kriza. I ftoj të gjitha palët që të bashkohemi tek të gjitha prerogativat kushtetuese që kërkohen për Presidentin e Republikës”, tha Idrizi.
