Vetëm Bajerni është kampioni i Gjermanisë” – brohorisnin të gjithë në “Allianz Arena”. “Është një ndjenjë e bukur kur e mban trofeun në duar”, tha Manuel Nojer i lumtur. Pas barazimit 2:2 ndaj Shtutgartit, bavarezët morën të dielën trofeun e kampionatit.
“Ne jemi të lumtur që tani mund të mbajmë “Meisterschahlen” në duar, dhe tani festojmë me ta(tifozët)”, tha kapiteni. Herët e fundit mungonin spektatorët, ndaj ishte shumë e rëndësishme që tifozët të ishin sërish aty. Fatkeqësisht, jo gjithçka funksionoi në fushë. Rezultati nuk është ai që donim, por mund të jetojmë me këtë gjë. Shtutgarti bëri më shumë pasi kishte më shumë nevojë për pikë. Nuk mund të flasim për një marrje të lehtë të ndeshjes, por gjithsesi motivimi nuk është më ai që ishte pas ndeshjes me Dortmundin dhe kjo ishte e kuptueshme”.
PËR SEZONIN – “Ishte një sezon me ulje-ngritje ku pa dyshim mund të bënim më mirë. Sidomos në Kupën e Gjermanisë dhe në Champions. Por rivaliteti ishte shumë i madh, sidomos në Europë. Vijareali tregoi dhe ndaj Liverpulit që ishte një skuadër e fortë”.
PËR NAGELSMANIN- “Si sezoni i parë i tij, mendoj që bëri një sezon të mirë. Nuk është e lehtë në Mynih, sidomos në fillimet e tua. Kjo ka vlejtur edhe për mua si lojtar, por dhe për shumë të tjerë që kanë nisur një kapitull të ri. Ky trofe do të jetë një shtysë për të bërë më mirë në sezonin tjetër. Bajerni është ndërtuar për të fituar dhe mendoj që trajneri e di këtë. Gjithmonë kemi qenë një skuadër kompetitive në të gjitha kompeticionet”.
PËR CHAMPIONS-in “Donim të shkonim në finale, por për ta bërë këtë duhet të kishim dhënë më shumë në ndeshjen e parë në Spanjë. Është e vështirë të luash 90 minuta në sulm, dhe kjo u pa në ndeshjen e dytë. Por do ta marrim atë zhgënjim si mësim për t’u rikthyer edhe më të fortë në sezonin e ardhshëm”.
