Edvin Kulluri, në një intervistë për Ditari në A2Cnn u shpreh se Sali Berishës i mungon legjitimiteti moral për të drejtuar Partinë Demokratike.
Kulluri, i cili muaj më parë kishte deklaruar se do të kandidonte për kreun e PD, është tërhequr nga gara, ndërsa akuzon se në këtë parti janë promovuar ata që kanë vjedhur vota për Lulzim Bashën.
“Basha vjet ka dyfishuar votat në kuti, kush ishin anëtarët e komisionit. Ata janë edhe po sot që janë Albana Vokshi dhe Belind Këlliçi. Këtë e ka provuar Edi Paloka me fjalët e tij që e pranoi se të gjithë kemi vjedhur vota për Bashën dhe shpërblehet me votë për të qenë kreu i Këshillit Kombëtar, kur duhet të ishte përjashtuar nga PD. Unë shoh produktin e Këshillit Kombëtar ku nuk votohet Ibsen Elezi, por Rudina Hajdari. Pazar, por këto janë vota e vullnet politik. Kjo është për të ardhur keq”, tha Kulluri.
Sipas tij kjo parti nuk mund të rrëzojë regjimin e Ramës, pasi në garë me qeverinë për të vjedhur vota, është e humbur.
“Kjo është partia që do të rrëzojë regjimin e Ramës? Po të jetë për të vjedhur vota garën e fiton qeveria. Ky është një projekt politik i dështuar “.
Ndërsa flet për tërheqjen e tij nga gara për kryetar të PD-së, Kulluri akuzon Berishën se po bën të njëjtën gjë si Basha 5 vjet më parë, duke e përçarë PD. Sipas tij kjo një aventurë personale e liderit historik demokrat me kosto për opozitën.
“Ndryshimet e 11 dhjetorit janë pozitive, por futja e primareve doli një gënjeshtër e madhe, ka nevojë për institucione dhe vullnet politik. Këtu mungon vullneti politik. PD o do të kthehet në parti politike ose e vullnetarëve të Berishës dhe Bashës. Këto nuk janë parti, por janë sekte ku ka një prift dhe të tjerët falen. Nëse është parti duhet të dominojnë këto parime që janë tradhtuar. Si mundet për dy javë që të dalë kryetari. Nga mbështetës i Bashës është bërë kundërshtar për një arsye. Personale. E vetmja e drejtë që ka thënë Basha është që “Berisha u ngrit kundër meje kur u përjashtua vetë. PD e zbuluan që ishte në krizë vetëm në 9 shtator. Berisha mund të zgjidhet kryetar, por i mungon legjitimiteti moral, se ka qenë pjesë e krizës dhe mbështetës i saj. Në atë parti nuk ka respekt për fjalën, njeriun, debatin dhe dinjitetin njerëzor dhe mendo që kur nuk kanë për ne, mendoni për qytetarët. Problemi i Berishës me SHBA është i pakapërcyeshëm sot”.
