Tirana është shpallur zyrtarisht kampione e Shqipërisë për sezonin 2021-2022. Bardheblutë fituan trofeun prestigjioz për herë të 26-të në histori pas triumfit 2-1 në derbi ndaj Partizanit. Tirana është 13 pikë para Laçit, diferencë që i jep sigurinë matematikore 4 javë nga përfundimi i kampionatit.
Për sa i përket ndeshjes së sotme, të kuqtë e nisën më mirë ndeshjen, duke rrezikuar që në minutën e shtatë me anë të Tedi Carës, i cili goditi jashtë kuadratit. Nuk vonoi shumë të zhbllokohej ndeshja, pasi Skuka me një roveshatë shtangu portierin Bekaj.
Festë e madhe te të kuqtë, por që nuk zgjati shumë. Taulant Seferi arriti ta barazonte ndeshjen pas shtatë minutash. Në fundin e pjesës së parë Skuka dhe Mala iu afruan golit të avantazhit, por nuk ia dolën dot.
Tirana e nisi në mënyrë fantastike pjesën e dytë, me Enur Totren që shtangu portierin Alban Hoxha. Në sulm Partizani më pas, me Skukën që goditi me kokë topin ngjitur me shtyllën.
Pak minuta më pas Hamiti dha një penallti, por VAR shpëtoi Tiranën. Në minutat në vazhdim pati luftë të fortë sportive dhe një gol të Seferit në pozicion jashtë loje, por jo ndryshim rezultati. Me këtë fitore Tirana kishte të drejtën të festonte titullin kampion.
Bardheblutë duket se kanë hapur një cikël të gjatë suksesesh pasi edhe me largimet e verës së shkuar arriti t’i plotësonte vendet bosh duke u konfirmuar kampione e Shqipërisë në një sezon ku kanë dominuar. Tashmë Tirana duhet thjesht të mbyllë sezonin me tre takimet e mbetura dhe të mendojë për ndeshjet e Ligës së Kampioneve në muajin korrik me sfidat e raundit të parë “play-off”.
