Ish-kryeministri Sali Berisha e quajti krim shtetëror humbjen e jetës së të riut Ilvi Meta në komisariatin e Kavajës dy ditë më parë.
Berisha kërkoi dorëheqjen e ministrit të Brendshëm Bledi Çuçi në një dalje për mediat.
Ish-kryeministri ftoi qytetarët të ngrihen në protesta paqësore ditën e nesërme para komisariateve në të gjithë vendit.
Po ashtu, u bëri thirrje organizatave të huaja të hetojnë për rastin.
“Java kishte një ngjarje tejet tragjike. Një i ri, Ilvi Meta humbi jetën në rrethana misterioze në qelitë e zeza të narkokomisariatit të policisë së Kavajës. Unë e kam ndjekur me shumë vëmendje këtë tragjedi njerëzore. Një i ri që merret për shoqërim apo i arrestuar në qelitë e komisariatit, kjo presupozon se ai hyn në vendin më të sigurt për jetën e tij dhe s’mund të ketë vend tjetër më të sigurt. I riu i shoqëruar mbi bazën e një vendimi gjykate në ora 8 e darkës gjendet i pajetë në qeli. Autopsia tregon se kishte shenjën e laku rreth qafe çka flet për varje. Vetëvarje apo e vari xhelati këtë nuk e di. S’mund të akuzoj se e vari ndonjë xhelat, s’mund të konfirmoj se vari vetëm”, u shpreh Berisha.
Më tej shtoi: “Por mund t’ju them sa vijon. Ilvi sipas dëshmive të shokëve e miqve ishte një djalë i hedhur pa asnjë lloj shenje të problemit më të vogël psikologjik apo psikik. Ai u arrestua me një provë absolutisht të paqëndrueshme. Gjurmët e gishtërinjve të tij u gjetën në derën e një lokali ku ai pinte kafe, ku ai pinte rregullisht kafe. Dhe ky u akuzua sikur ka marrë derën. Po unë s’po merrem me verën penale që edhe të jetë e vërtetë përbën një vepër penale që shkon maksimumi 6 muaj burg ose dënim me kusht. Por jam për të denoncuar që qelitë e komisariatit të policisë janë shndërruar në qelitë po kaq të zeza sa ç’ishin qelitë e sigurimit të shtetit. S’ka vend të lirë në Europë e botë që në një hark kohor 5 javor të regjistrojë dy vdekje të dy të rinjve në komisariatet e policisë. Arben Mici në Kamzë dhe tani Ilvi Meta në Kavajë. S’ka ndodhur kurrë kjo në 30 vite, ju garantoj se edhe në kohën e hetuesive më të rrepta mund të ketë ndodhur para viteve 60 por, prapa kishte një torturë çnjerëzore por jo në atë shkallë që të humbnin jetën në qeli. A u ushtrua një terror i madh psikologjik ndaj Ilvi Metës nëse ai vendosi të vetëvarej? Jashtë çdo dyshimi Kavaja vuan shumë nga një rrjet grabitësish që kanë krijuar shqetësim të madh, por kjo s’do të thotë të vriten njerëz në qeli. Kurrën e kurrës! A e vari dikush atë me kordonin e kapuçit të tutave, s’përjashtohet në menynë absolute. Por ajo që është po kaq e shëmtuar dhe kriminale është heshtja ç’njerëzore dhe cinike e të gjitha organeve shtetërore para këtyre akteve. Të cilat mirëfilltës përbëjnë me dashje ose jo vrasje shtetërore. Ai që administron atë ndërtesë dhe atë qeli, ai është i detyruar ta privojë personin nga çdo lloj mjeti që mund të përdoret për vetëvrasje, rregulli më elementar, përfshirë lidhëse e këpucëve”.
Ish-kryeministri solli në vëmendje të tjera humbje jete në komisariatet e vendit. Ai dënoi qëndrimin e Gledis Nanos dhe kërkoi dorëheqjen e ministrit Çuçi.
Po ashtu, bëri apel për protesta para komisariateve ditën e nesërme.
“Për tjetrin na thanë se me çakmak ndezi sfungjerin dhe vdiq në banjo nga asfiksia. Për Eneo Ftoin në Korçë edhe atë për akuzë të njëjtë, edhe ky vrau veten që kishte trauma të mëdha trupore. Ministri i familjes që në vend që të merret me zbatimin e ligjit është gardian i interesave kriminale të klanit Rama. Drejtori i përgjithshëm i policisë heshti sikur s’ka ndodhur asgjë. Kjo është dhe më kriminale. Heshti kur në një hark kohor 5 javor 2,3 u vdiqën në qelitë e komisariatit të policisë ku duhet të ishin më të sigurt se çdo gjë tjetër. Duke dënuar këtë qëndrim çnjerëzor të Edi Ramës, ministrit të tij familjar Çuçi, drejtorit të përgjithshëm të policisë Gledis Nano, kërkoj dorëheqjen e menjëhershme të ministrit çuçi. Unë do ti propozoj sot komisionit të rithemelimit nesër në ra 8 pranë të gjithë komisariateve të Shqipërisë të ndizen qirinj në një protestë paqësore, stop vrasjeve në komisariate”, u shpreh Berisha.
Apel për hetim i bëri institucioneve ndërkombëtare.
“I bëj thirrje Komisionit të të Drejtave të Njeriut të OKB-së, komitetit anti-torturë të këshillit të Europës, me urgjencë dhe procedura të përshpejtuar të ushtrojnë çdo kontroll të duhur mbi institucionet e vuajtjes së dënimit dhe organet e policisë në mënyrë që të marrin fund dramat e tmerrshme njerëzore në birucat e këtyre komisariateve, të marrin fund qëndrimet e këtyre qeveritarëve që në fakt nuk kanë asnjë ndjeshmëri për jetët njerëzore, vdekje të të rinjve, asfiksim apo djegie për së gjalli siç ndodhi në Kamzë. Por jemi në rrafshin e lirive dhe të drejtave njerëzore. De fackto ato po arrijnë nivele diktatoriale, në nivelet e Rusisë së Putinit. Edhe atje ka protesta, ka diktaturë, ka barbari, burgjet mbushen, por dalin në protesta”, shtoi ai.
