Partizani mori një fitore 1-2 në transfertën e vështirë ndaj Kukësit në një ndeshje të çmendur. Tashmë ekipi i kuq më në fund nuk e sheh Europën nga poshtë, por për herë të parë ka gjithçka në dorën e vet dhe ndodhet në kushte shumë komode.
Janë edhe 4 ndeshje për t’u luajtur dhe të kuqve u lejohet edhe një hap fals, teksa nëse marrim në konsideratë renditjen aktuale, ata e kanë garën vetëm me Kukësin. Edhe në rast se Vllaznia arrin t’i parakalojë deri në fund të sezonit, Partizani e siguron Europën, pasi nëse shkodranët dhe Laçi renditen në tri vendet e para në kampionat, kualifikohet në Ligën e Konferencës edhe vendi i katërt.
Kjo ndodh sepse Laçi dhe Vllaznia diskutojnë së bashku në finalen e Kupës. Kështu, pas fitores ndaj Kukësit, “demat” kanë bërë një hap të madh drejt Ligës së Konferencës. Diferenca aktuale me Kukësin është tri pikë, por mund të konsiderohet katër, sepse Partizani ka avantazhin në përballjet direkte dhe Kukësit i duhet me patjetër të grumbullojë më shumë pikë se skuadra e Dritan Mehmetit, për të arritur kualifikimin.
KARTONËT E KUQ- Në dy ndeshjet e fundit, Partizani e ka mbyllur ndeshjen me një lojtar më pak dhe mes pozitivitetit të madh pas Kukësit, ky fakt nuk është një shenjë e mirë.
Në derbin me kryesuesit kthehet Matondo, që u përjashtua ndaj Dinamos, por ulen alternativat në stol për Mehmetin. Gresild Lika dhe Maget Gueje dolën me të kuq ndaj Kukësit dhe nuk janë të gatshëm për Tiranën. Të dy janë lojtarë, të cilët janë aktivizuar rrallë nga trajneri, por në situata të caktuara mund të bëhen shumë të nevojshëm.
MISIONI PËR TIRANËN – Skuadra dje ka nisur stërvitjen, teksa të gjithë lojtarët ishin të pranishëm. Nuk ka dëmtime dhe Mehmeti, përveç të lartpërmendurve, i ka të gjithë të gatshëm.
Dje kanë nisur përgatitjet për “derbin” me Tiranën, me “demat”, që kërkojnë me patjetër të shtyjnë festën e bardhebluve për të mos u shpallur kampionë në atë ndeshje, pasi nëse ndodhte, do të ishte një hakmarrje e bujshme pas asaj që ndodhi në vitin 2019, kur Partizani siguronte matematikisht titullin pikërisht ndaj Tiranës. Dje Mehmeti i studioi nga pranë bardheblutë, pasi ishte në stadium në Teuta-Tirana./Panoramasport