Kampionati i femrave ka luajtur këtë të shtunë të gjitha ndeshjet e vlefshme për javën e 20-të.
Kur kanë mbetur vetëm dy javë nga përfundimi i kampionatit, ekipi i Vllaznisë është një hap larg titullit të nëntë kampion në futbollin e femrave. Ekipi shkodran do të luante ditën e sotme ndaj Tiranës, por ekipi bardheblu nuk ka udhëtuar drejt veriut, duke humbur në tavolinë ndeshjen dhe duke i dhuruar kështu tre pikët Vllaznisë, që në dy ndeshjet e radhës do të luajë ndaj Partizanit e Skënderbeut.
Nga ana tjetër, Apolonia ka shkatërruar me rezultatin 17-0 Lushnjen, një sfidë kjo totalisht e dominuar nga fieraket, të cilat ngjiten në vendin e dytë, në kuotën e 44 pikëve.
Në ndeshjet e tjera të javës së 20-të, Partizani mundi Tirana AS në derbin e kryeqytetit. Të kuqet fituan me shifrat e thella 8-0, duke siguruar kështu një tre pikësh shumë të rëndësishëm që i mban aktualisht në vendin e katërt në renditje.
Murlani mposhti në shtëpi me rezultatin 4-0 skuadrën e Skënderbeut, ndërsa një tjetër sfidë emocionuese u zhvillua në Shkodër mes Atletik Club – KF Teuta, që përfundoi me fitoren e verioreve, 4-3.
Rezultatet e ndeshjeve të javës së 20-të:
Vllaznia 3-0 Tirana *
Apolonia 17-0 Lushnja
Tirana AS 0-8 Partizani
Atletik Club 4-3 Teuta
Murlani 4-0 Skënderbeu
