Një njësi patrulluese kufitare e Policisë së Kosovës është sulmuar me armë zjarri orët e para të mëngjesit të sotëm në fshatin Zupçe të Zubin Potokut, pranë kufirit me Serbinë.
Policia e Kosovës njofton se nga sulmi nuk ka të plagosur.
“Lidhur me rastin janë ndërmarrë të gjitha veprimet e menjëhershme policore, ku në vendngjarje kanë dalë edhe njësitet policore të rendit nga stacioni policor Zubin Potok, të cila kanë njoftuar se njësiti kufitar janë sulmuar me armë zjarri, përveç dëmeve materiale në automjet nuk raportohet për zyrtarë të lënduar. Policia e Kosovës, në bashkëpunim dhe koordinim me organet e drejtësisë janë duke ndërmarrë të gjitha veprimet e nevojshme hetimore lidhur me rastin, përderisa ka shtuar masat policore me qëllim të sigurisë së zyrtarëve policorë dhe qytetarëve”, thuhet në një njoftim zyrtar të Policisë së Kosovës.
Policia e Kosovës është sulmuar disa herë javët e fundit, ndërsa janë hedhur akuza se sulmet kanë ardhur nga toka serbe.
Situata është shfaqur e tensionuar mes dy vendeve edhe në retorike, me Kurtin e Vuçiçin që kanë hedhur akuza ndaj njeri-tjetrit si “Hitler”, “Putin i Ballkanit”, etj.
