Komisioneri për Zgjerimin dhe Fqinjësinë e Mirë, Oliver Varhelyi, do të vizitojë Tiranën më 28 prill, në kuadër të një turi në Rajon, por nuk pritet të japë asnjë sinjal pozitiv për nisjen e negociatave mes BE dhe Shqipërisë.
Ajo që pritet të pohohet në Tiranë është veto bullgare ndaj Maqedonisë së Veriut, që penalizon edhe Shqipërinë, pasi të dy vendet kanë një rrugëtim të përbashkët në raport me BE.
Kryeministri Edi Rama, gjatë vizitës në Berlin, pohoi se Shqipëria do të presë deri në qershor të 2022 dhe nëse nuk ka hapje negociatash për shkak të vetos bullgare, atëherë do të kërkojë ndarjen e procesit nga Maqedonia e Veriut.
Referuar vizitës së Komisioneri i BE pati në Sofje, duket qartazi se Bullgaria nuk do të heqë dorë nga veto ndaj Maqedonisë së Veriut pa u përmbushur më parë kërkesa e përfshirjes së pakicës bullgare në kushtetutën e Maqedonisë. Ky qëndrim është konfirmuar edhe nga ministrja e Punëve të Jashtme të Bullgarisë, Teodora Gençovska, para fillimit të forumit “BE dhe Ballkani”. Gençovska sqaroi se ky kusht për Maqedoninë është vendosur në deklaratën e parlamentit të vendit të saj dhe në vendimet e Këshillit Konsultativ për Siguri Kombëtare.
“Për të filluar procesin e negociatave të anëtarësimit në BE, mbetet kërkesa që Republika e Maqedonisë së Veriut të regjistrojë bullgarët në Kushtetutën e saj. Në këtë fazë fillimisht duhet ta zbatojnë dhe më pas të fillojnë negociatat me ta. Nuk e di se çfarë sinjalesh ka dhënë kryeministri (Kiril Petkov), por ky është qëndrimi ynë”, ka thënë ajo.
Komisioneri për Fqinjësinë dhe Zgjerimin Varhelyi, u shpreh i zhgënjyer me penalizimin që po i bëhet dy vendeve.
“Nëse ke pushtet dhe nuk e përdor, kjo konsiderohet nga të tjerët si kapitullim, dorëzim i pushtetit tënd dhe i kapaciteteve të tua. Çështja për Shqipërinë dhe Maqedoninë e Veriut është kur do fillojmë procesin e negociatave të anëtarësimit. Nuk mund ta fsheh zhgënjimin tim, që jemi ende duke vazhduar të diskutojmë këtë çështje. Ne menduam se e kishim zgjidhur dy vjet më parë dhe tani kjo është sërish në tryezë”, tha ai nga Sofja.
Varhelyi theksoi se BE-ja nuk ka as kohë dhe as interes që të shtyjë konferencat e para ndërqeveritare me Shkupin dhe Sofjen.
“Të gjitha shtetet anëtare duhet të kuptojnë fuqinë transformuese të procesit të anëtarësimit. Dhe ky është mesazhi që po sjell përsëri në Sofje. Kam qenë këtu para tre javësh dhe do të vij sa të jetë e nevojshme për ta zgjidhur këtë çështje në qershor të këtij viti, sepse lufta në Ukrainë na ka treguar se nuk kemi kohë për të humbur dhe as interes që ky proces nuk vonohet”, tha ai.
Sipas tij, “lufta në Ukrainë dhe mësimet e së kaluarës kanë treguar se procesi i integrimit të plotë të Ballkanit Perëndimor në BE duhet të përshpejtohet”.
Dhe referuar të gjithë kësaj situate, Komisioneri i BE në vizitën në Tiranë duket se do të “ngushëllojë” Kryeministrin Edi Rama për një tjetër shtyrje të arkivuar në procesin e integrimit, edhe pse referuar shisheve të shampanjës që Rama ka hapur vite më parë, sot Shqipëria duhej të ishte në gjysmën e rrugës në realizimin e kapitujve që parashikohen për tu plotësuar pas hapjes së negociatave.
