Nuk ka dritë jeshile nga Bullgaria për çeljen e negociatave për Maqedoninë e Veriut me Bashkimin e Europian.
“Për të filluar procesin e negociatave të anëtarësimit në BE, mbetet kërkesa që Republika e Maqedonisë së Veriut të regjistrojë bullgarët në Kushtetutën e saj”. Kjo ka qenë deklarata e sotme e ministres së Punëve të Jashtme të Bullgarisë Teodora Genchovska para konferencës sot në Sofje “Forumi BE takon Ballkanin”, me pjesëmarrjen e vendeve evropiane.
Ky qëndrim i diplomates bullgare tregon se Bullgaria nuk tërhiqet në veton e vendosur për hapjen e negociatave të Maqedonisë së Veriut. Kjo pengon edhe Shqipërinë, pasi integrimi i dy vendeve po shqyrtohet si një çështje e vetme.
Komisioneri i BE-së për Fqinjësinë dhe Zgjerimin Varhelyi, i cili ndodhet në Sofje, është shprehur i zhgënjyer lidhur me pengesat për çeljen e negociatave me dy vendet.
“Nëse ke pushtet dhe nuk e përdor, kjo konsiderohet nga të tjerët si kapitullim, dorëzim i pushtetit tënd dhe i kapaciteteve të tua. Çështja për Shqipërinë dhe Maqedoninë e Veriut është kur do fillojmë procesin e negociatave të anëtarësimit. Nuk mund ta fsheh zhgënjimin tim, që jemi ende duke vazhduar të diskutojmë këtë çështje. Ne menduam se e kishim zgjidhur dy vjet më parë dhe tani kjo është sërish në tryezë”, tha ai pas takimit me kryediplomaten bullgare, Teodora Genchovska.
