Të tjera detaje raportohen lidhur me plagosjen e ndodhur në Pogradec pasditen e së hënës.
Dyshohet se ngjarja ka lidhje me një konflikt disa vjeçar mes personave. Ngjarja e ndodhur ditën e sotme ka lidhje me atentatin e dy viteve me parë ku u qëllua drejt hotel Voloreka.
Nga ngjarja e sotme i plagosur në këmbë ka mbetur djali i pronarit të hotelit, Joan Muçllari, i cili u dyshua si shënjestër e atentatit të mëparshëm. Dyshimet për ditën e sotme janë se njëri nga autorët është një nga personat e përfshirë edhe në atentatin e vitit 2020.
Dy autorët e shpallur në kërkim nga policia janë shtetasit Firdeus Berberi dhe Gresi Maxhari.
Firdeus Berberi, njëri nga autorët që ka qëlluar ndaj Joan Muçllarit (djali i pronarit të hotel Voloreka) duke e lënë të plagosur, është djali i Ilir Berberit.
Ilir Berberi është arrestuar para 2 vitesh nga policia pasi akuzohet se ka qëlluar në drejtim të hotel Volorekës me breshëri armësh.
Berberi së bashku me tre personat e tjerë u arrestuan nga policia. Sipas policisë, ai dyshohet të ketë qenë dhe ishte organizator i kësaj ngjarjeje.
Zanafilla e konfliktit
Në fillim Joan Muçllarit i kanë djegur një makinë BMW x6 në vitin 2020. Jetmir Muçllari, pronari i hotelit ka bërë padi dhe pastaj ka shkuar për të dëshmuar në gjykatë. Në gjykatë i ka dalë para Ilir Berberi dhe i biri Fierdeus Berberi dhe i kanë thënë mos dëshmo.
Jetmir Muçllari ka hyrë në Gjykatë dhe ka dhënë dëshminë. Më pas, Ilir Berberi ka shkuar te hoteli dhe ka qëlluar me breshëri arme .
Mes të arrestuarve si autorë të ngjarjes së ndodhur pranë një hoteli në Tushemisht, ku u qëllua me breshëri armësh, në 2020 u arrestua edhe Ilir Berberi. Ai u arrestua nga policia në një çadër që kishte ngritur enkas për tu strehuar.
Lidhur me ngjarjen e ndodhur sot, ku u plagos Joan Muçllari, policia doli me njoftim zyrtar.
Njoftimi i Policisë:
Pogradec
Plagosën me armë zjarri gjatë një konflikti të çastit një shtetas, identifikohen dhe shpallen në kërkim dy autorët e dyshuar të ngjarjes.
Më datë 25.04.2022, rreth orës 16:00, në Spitalin e Pogradecit është paraqitur për mjekim, jashtë rrezikut për jetën, i dëmtuar në këmbë shtetasi J. M., i cili dyshohet të jetë plagosur në lagjen “Voloreka”, me armë zjarri tip pistoletë, gjatë një konflikti të çastit, nga dy shtetas të tjerë.
Menjëherë në vendngjarje, kanë shkuar shërbimet e policisë dhe nga veprimet e para u bë e mundur identifikimi i dy autorëve të dyshuar konkretisht shtetasit F. B. dhe G. M.
Nga ana e Policisë janë ngritur pika kontrolli dhe po punohet për kapjen e tyre dhe sqarimin e rrethanave të ngjarjes.
