Guvernatori i Bankës së Shqipërisë, Gent Sejko paralajmëron rritje të mëtejshme të çmimeve.
Në 21 – 24 prill, Sejko, mori pjesë në “Mbledhjet e Pranverës” të Fondit Monetar Ndërkombëtar (FMN) dhe të Grupit të Bankës Botërore (BB), në Uashington.
Në një njoftim nga Banka e Shqipërisë, bëhet me dije se guvernatori ka deklaruar se “dy vitet e fundit kanë qenë të paprecedenta dhe sfiduese për ekonominë shqiptare, duke u përballur me tërmetin e vitit 2019, pandeminë e cila filloi në vitin 2020 me pasojat e së cilës ende po përballemi dhe viti 2022, i cili përkon me nisjen e sulmit ushtarak të Rusisë ndaj Ukrainës dhe krizën ndërkombëtare të çmimeve”.
“Ai shtoi se inflacioni në Shqipëri pritet të qëndrojë mbi objektivin e Bankës gjatë vitit 2022, në pasqyrim të goditjeve që vijnë nga çmimet e rritura në tregjet ndërkombëtare, megjithatë, kjo goditje do të ketë efekte të përkohshme. Në këtë kontekst, Guvernatori theksoi se rritja e çmimeve në tregjet botërore dhe reduktimi i kërkesës së huaj, do të shoqërohen me norma më të larta inflacioni dhe rritje më të ngadaltë ekonomike krahasuar me vlerësimet e mëparshme të Bankës”, thuhet më tej në njoftim.
Nga ana tjetër, përfaqësues të FMN-së nënvizuan nevojën e monitorimit të vazhdueshëm të presioneve inflacioniste dhe në rast se do të jetë e nevojshme, reagimin e mëtejshëm të politikës monetare për të garantuar respektimin e objektivit të stabilitetit të çmimeve.
Në një deklaratë në muajin Shkurt, Sejko vlerësoi se inflacioni do të ishte mbi 3% gjatë këtij viti.
Ndërkohë, sipas të dhënave zyrtare të INSTAT, në muajin Mars inflacioni rezultoi 5.7%, duke shënuar nivelin më të lartë që prej vitit 2002.
