Kreu i grupit parlamentar të PS-së, Taulant Balla, pritet të zhvillojë ditën e sotme një takim lidhur me çështjen e zgjedhjes së Presidentit të ri, me kreun e grupit parlamentar “Aleanca për Ndryshim”, Fatmir Mediu.
Takimi pritet që të zhvillohet në orën 16:00 në Kryesinë e Kuvendit.
Po ditën e sotme, ishte parashikuar një takim mes Ballës dhe Enkelejd Alibeaj, në cilësinë e kreut të grupit parlamentar të PD-së. Megjithatë raportohet se ky takim është shtyrë për një ditë tjetër.
Enkelejd Alibeaj tha dje se pritet të marrë mendimin e grupit parlamentar që e ka thirrur ditën e sotme, për të mbajtur një qëndrim.
Ndërsa një ditë më parë, Fatmir Mediu tha në një deklaratë për mediat, se kreu i shtetit duhet të jetë një emër me integritet dhe të marrë konsensusin e gjerë të partive politike. Ai u shpreh se opozita duhet të ketë një qëndrim të unifikuar.
Nisja formale e procesit do konkretizohet me votimin e raundit të parë më 4 Maj në Kuvend.
Procesi konsiderohet gjerësisht si farsë, pasi PS i plotëson votat e vetme për zgjedhjen e kreut të ri të shtetit.
