Skënderbeu mori një pikë ndaj Partizanit në transfertë, pikë e cila mund të quhet me vlerë duke parë frenimin e rivalit për mbijetesë, që për momentin është Egnatia, por edhe reagimin e ekipit pas asaj humbjeje tepër të rëndë në shtëpi përballë Tiranës.
Një barazim ky që me sa duket rrit disi moralin në kampin bardhekuq, moral që para disa ditësh dukej në tokë dhe i humbur.
Por Dajan Shehi e sheh disi ndryshe situatën e Skënderbeut. Sipas tij, nisur nga ajo çka ka deklaruar lojtari pas barazimit me Partizanin, ekipi asnjëherë nuk është dorëzuar, por kanë qenë disa rrethana që e kanë sjellë skuadrën deri këtu.
“Mungesa e fatit dhe dëmtimet kanë qenë ato që e kanë ndjekur Skënderbeun gjatë këtij sezoni. Meqenëse e nisët me Tiranën po e vazhdoj edhe unë që këtu. Të them të drejtën ndaj Tiranës kishim shumë mungesa dhe me një ekip gati të boshatisur ishte e pamundur të bënim mrekullinë.
Mungonin lojtarë të rëndësishëm, siç ishte kapiteni Zguro e Berisha, por edhe disa të tjerë. Me rikthimin e tyre u pa ndryshimi menjëherë. Ndaj Partizanit u kthyen lojtarët dhe bëmë një ndeshje shumë të mirë. U mbrojtëm mirë dhe menduam ta goditnim Partizanin në kundërsulm.
Patëm rastet tona dhe pretendimet tona, por sërish nuk arritëm të dilnim me tri pikë pasi për to kishim shkuar në këtë takim. Përtej këtij rezultati, më vjen keq që jemi në fund të renditjes, nuk e meritojmë këtë vend.
Por mos na quani të dorëzuar, ne besojmë te mbijetesa, ndaj edhe për këtë do të kërkojmë fitoren ndaj Egnatias”, u shpreh fillimisht Shehi.
