Ish-kryeministri Sali Berisha tha se kongresi i Partisë Socialiste ishte si kongresi i mafias.
“Ishte si një kongres i Cosa Nostra. Aty u caktuan killerët që do të lanin hesapet me kundërshtarët. Aty u përzgjodh skrapi, aty të cilët kanë pasur ndonjë vërejtje apo dyshim, duke e quajtur SPAK-un, si SPAK-u i partisë, u gjetën të zhgënjyer, në mënyrë të përsëritur”, tha Berisha në konferencë për mediat.
“Edi Rama, kreu i organizatës, u deklaroi se SPAK është vepër e PS. Është fëmija i saj, pjellë e saj dhe këtë ta dijë Shqipëria dhe bota. Në diktaturë institucionet quheshin si “armë” të partisë dhe diktaturës së proletariatit. Kreu i organizatës kriminale ngarkoi me detyrë ‘skap’-in e partisë. U tha se e do patjetër në burg Sali Berishën dhe në djall opozitën. Kuvende të tilla edhe Partia e Punës ka zhvilluar në 1948, 1956 dhe në vitet 1970, por kaq të paskrupullt jo, përpiqej të maskonte diçka”, shtoi ai.
Berisha tha se Rama e thirri kongresin për disa arsye, që sipas tij, nuk lidhen me problemet dhe hallet e shqiptarëve.
“Interesat e planeve mafioze të drogës e shtynë, frika dhe tmerri se mos SKAP-i i opozitës mund të mendonte që ti afrohej atij, apo rrethit të tij më të ngushtë. Mund të imagjinonte të digjte në flakët e inceneratorëve organizatorët e kësaj afere. Me Sali Berishën ai ka një problem madhor, nuk bën dot pazare të pista”, u shpreh ish-kryeministri.
