Ish-kryeministri Sali Berisha foli për një seri drekash e darkash që sipas tij, janë konsumuar mes ish-kreut të PD-së Lulzim Basha dhe ish-deputetit socialist Aqif Rakipi, i shpallur së fundmi “non grata” nga SHBA.
Berisha tha se mbështet sanksionet e autoriteteve, por shtoi se vetëm ato që “mbështeten në fakte, argumente e prova”.
Në njoftimin e autoriteteve amerikane për sanksionet ndaj Aqif Rakipit, theksohet se ish-deputeti është pjesë e një grupi kriminale dhe “ka një ndikim dëmtues dhe destabilizues në proceset politike”. Këtë të Premte, Berisha tha se dënon në mënyrë absolute ccdo akt shitje apo blerje vote.
Gjatë një konference për mediat, Berishës iu kërkua një opinion për shpalljen non grata të ish-deputeti socialist Aqif Rakipi.
“Kam qenë dhe mbetem për çdo lloj sanksioni që bazohet në fakte, dokumenta dhe prova. Këtu nuk kam asnjë hezitim ndaj cilitdo. Rasti konkret. Nuk jam futur shumë në hollësi, se po të futesha më dilte një seri drekash dhe darkash të Lulzim Bashës me Qifen, apo përpjekjet e tij për ta angazhuar në koalicion me PD. Unë e kam takuar një herë në jetën time dhe në absolute dënoj çdo akt blerje apo shitje vote. Por meqenëse insistuat në këtë. Përse e kam mbajtur përgjigjen time, që mbështes çdo vendim ta bazuar në fakte dhe sigurisht nuk mbështes asnjë vendim që nuk ka fakte, argumenta dhe prova. Elaborimi i mëtejshëm është që dënoj çdo akt shitje dhe blerje vote. Nuk jam ndalur tek personi se po të flisja më dilte seriali i drekave të Bashës me të”, tha Berisha.
Vetë Aqif Rakipi është shprehur se, pas vendimit të autoriteteve amerikane ka gisht Lulzim Basha.
