Ish-kryeministri Sali Berisha deklaroi këtë të Enjte se nëse ka një njeri që duhet të hetohet për afera konkrete pas Ramës dhe ministrave të tij, është Lulzim Basha.
Deklaratat i bëri në përgjigje të interesit të gazetarëve jashtë Kuvendit, të cilët i kujtuan deklaratat e Bashës më herët gjatë ditës, se duhet të hetohen personat e shpallur “non grata” nga SHBA.
“Nëse ka një njeri për afera konkrete që duhet të pyetet pas Ramës dhe ministrave të tij është pikërisht Lulzim Basha”, u shpreh Berisha.
Ish-kryeministri përmendi dosjen “Toyota Yarsin” dhe atë “ruse”, duke shtuar se kjo e fundit u mbyll me ndërhyrjen e kryeministrit Edi Rama.
“Pyeteni Lulzim Bashën për çfarë arsye u ktheve nga Roma në Tiranë dhe nuk shkoi dot në SHBA? E ka të hapur dosjen Muzin, nëse shkonte përballej me ligjin kjo ndodhte. Dhe ndaj u kthye”, tha po ashtu Berisha.
“Ka një seri procesesh, ia ka krijuar vetes. Ka procesin me FBI, me drejtësinë belge, në mos ndërhyjë edhe ndonjë drejtësi tjetër pastaj”, shtoi ai.
I pyetur a ka frikë nga SPAK, Berisha tha: Absolutisht. Nuk i druhem asgjëje mbi tokë. Kam kodin tim të pathyeshëm.
