Laçi është finalist i Kupës së Shqipërisë për herë të pestë në historinë e tij. Deri tani kurbinasit kishin arritur 4 herë në finale dhe e kanë fituar 2 herë trofeun. Menjëherë pasi bardhezinjtë vulosën kualifikimin dje kundër Teutës, drejtuesit dhe trajneri Duro kanë shkuar ta shohin ndeshjen Vllaznia-Partizani në lokal.
Sapo kanë hyrë kanë parë që ka shënuar gol Mala. Shpëtim Duro ka reaguar i pari në mënyrë festive: “Gol…”! Dikush nga të pranishmit e ka pyetur me humor: “Timo, akoma bën tifo për Partizanin…?!”. Ndërkohë trajneri i është përgjigjur qetësisht: “Unë jam tifoz i tyre, nuk e mohoj. Kam dëshirë të kalojnë ata në finale”. Në fakt dëshira nuk i është plotësuar trajnerit kryeqytetas, sepse në fund ia ka dalë Vllaznia pas “ruletës” së penalltive.
Por gjithsesi Shpëtim Duro sërish do të ketë një kundërshtar që e respekton shumë, sepse në vitin 2012 ka qenë edhe trajner i Vllaznisë. Në tavolinë me trajnerin e Laçit kanë qenë edhe presidenti i kurbinasve, Pashk Laska, drejtori Naim Halili, Edmond Haxhia dhe ish-sulmuesin e Partizanit e të Laçit, Edmond Dosti. Laçi dhe Vllaznia do ta luajnë finalen e edicionit të 70-të të Kupës më 31 maj./Panoramasport
